Guðlaugur Þór Þórðarson tekinn við umhverfis- og auðlindaráðuneytinu af Guðmundi Inga Guðbrandssyni

Ráðherraskipti urðu í umhverfis- og auðlindaráðuneytinu í dag þegar Guðlaugur Þór Þórðarson tók við embætti umhverfis-, orku- og loftslagsráðherra af Guðmundi Inga Guðbrandssyni.

„Það verður krefjandi að takast á við komandi verkefni sem snúast um einhver stærstu mál samtímans og framtíð okkar allra. Ný ríkisstjórn hefur sett þessi mál á oddinn og það er tilhlökkunarefni fyrir mig að leiða þessa mikilvægu málaflokka,” segir Guðlaugur Þór.

Nýr stjórnarsáttmáli annars ráðuneytis Katrínar Jakobsdóttur forsætisráðherra var kynntur í gær. Í sáttmálanum er lögð áhersla á markvissar og metnaðarfullar aðgerðir til að draga úr losun vegna landnotkunar og hraða orkuskiptum á öllum sviðum.