Jafnrétti
Forsætisráðuneytið fer með mál sem varða jafnrétti, þar á meðal lög jafna stöðu og jafnan rétt kynjanna (jafnréttislög), lög um jafna meðferð utan vinnumarkaðar, lög um jafna meðferð á vinnumarkaði og lög um kynrænt sjálfræði. Jafnréttisstofa, kærunefnd jafnréttismála og Jafnréttissjóður Íslands heyra einnig undir ráðuneytið.
Markmið jafnréttislaga er að koma í veg fyrir mismunun á grundvelli kyns og koma á og viðhalda jafnrétti og jöfnum tækifærum kynjanna á öllum sviðum samfélagsins. Allar manneskjur skulu eiga jafna möguleika á að njóta eigin atorku og þroska hæfileika sína óháð kyni.
Jafnréttismálin koma þó við sögu innan allra ráðuneyta. Öll ráðuneytin hafa gert jafnréttismat á málefnasviðum og málaflokkum sem þau bera ábyrgð á og hafa þær upplýsingar verið teknar saman í skýrslu um kortlagningu kynjasjónarmiða. Skýrslunni er ætlað að varpa ljósi á þær áskoranir sem til staðar eru í jafnréttismálum og ávarpa má með markmiðssetningu, hvort sem það er við stefnumótun, lagasetningu eða fjárlaga- og áætlanagerð.
Jafnréttisverðlaun Vigdísar Finnbogadóttur verða afhent í fyrsta sinn í júní nk. í Strassborg. Um er að ræða alþjóðleg verðlaun sem ríkisstjórn Íslands og Evrópuráðsþingið standa að. Opið er fyrir tilnefningar til verðlaunanna til 15. mars nk. Verðlaunafé er 60.000 evrur.
Forsætisráðuneytið hvetur öll til að senda inn tilnefningar um einstaklinga eða samtök sem viðkomandi telja að eigi skilið að fá verðlaun fyrir framúrskarandi störf í þágu kynjajafnréttis.
Nánari upplýsingar og eyðublað til að skila inn tilnefningum
Algengar spurningar
Algengar spurningar og svör um jafnréttismál.
Útgefið efni
Rit, skýrslur og annað útgefið efni á sviði jafnréttismála.