Heimild til að sameina skólanefnd grunnskóla, tónlistarskóla og leikskóla.
Grein
Skólaskrifstofa Suðurlands 6. janúar 1997 96120064
Jón Hjartarson 1000
Austurvegi 2
800 Selfoss
Félagsmálaráðuneytinu barst þann 23. desember 1996 bréf frá menntamálaráðuneytinu, dagsett 12. sama mánaðar, þar sem framsent er erindi yðar frá 21. nóvember 1996. Í erindinu er óskað eftir “úrskurði um það, hvort sveitarstjórnum sé heimilt að slá saman skólanefnd grunnskóla við skólanefnd tónlistarskóla og/eða leikskóla og kalla þessa samsláttarnefnd t.d. fræðslunefnd.”
Í 1. mgr. 58. gr. sveitarstjórnarlaga nr. 8/1986 segir svo:
“Heimilt er sveitarstjórn að sameina nefndir þannig að ein nefnd fari með verkefni á fleiri en einu sviði þótt svo sé kveðið á í lögum að kjósa skuli sérstaka nefnd til þess að fara með tiltekin verkefni.”
Jafnframt segir svo m.a. í athugasemdum með 58. gr. frumvarps til sveitarstjórnarlaga:
“Hér er sveitarstjórn heimilað að sameina nefndir, en fjöldi lögbundinna nefnda hjá sveitarfélögum er í mörgum tilvikum of mikill að mati sveitarstjórnarmanna.”
Félagsmálaráðuneytið telur ljóst af framangreindu lagaákvæði að sveitarstjórnum sé heimilt að sameina nefndir með þeim hætti sem um getur í fyrirspurn yðar. Eru þess nú þegar fjölmörg dæmi hjá sveitarfélögum og kemur sú skipan fram í samþykkt um stjórn og fundarsköp viðkomandi sveitarfélags, sbr. 49. gr. sveitarstjórnarlaga.
Ráðuneytið vill jafnframt taka sérstaklega fram vegna fyrirspurnar yðar, að það telur að ákvæði sérlaga varðandi áheyrnarfulltrúa, t.d. laga um grunnskóla, gildi áfram þrátt fyrir sameiningu nefnda. Þannig eiga t.d. fulltrúar kennara, skólastjóra og foreldra rétt til setu á fundum fræðslunefndar þegar fjallað er þar um málefni grunnskóla, sbr. 13. gr. laga um grunnskóla nr. 66/1995.
F. h. r.
Húnbogi Þorsteinsson (sign.)
Sesselja Árnadóttir (sign.)