Akraneskaupstaður - Ósk um svör við spurningum, aðgangur bæjarstjórnarmanna að gögnum
Gunnar Sigurðsson, bæjarfulltrúi
27. júlí 2006
FEL06040051
Espigrund 3
300 Akranesi
Vísað er til erindis yðar, dags. 28. mars 2006, þar sem óskað er eftir liðsinnis ráðuneytisins til þess að
knýja fram svör við tilteknum spurningum sem fram koma í meðfylgjandi bréfi til bæjarstjórans á
Akranesi dags. 31. janúar 2006. Með bréfi ráðuneytisins, dags. 4. maí 2006, var óskað umsagnar
Akraneskaupstaðar um erindið og barst hún ráðuneytinu með bréfi dags. 8. júní 2006. Einnig var
ráðuneytinu sent afrit af bréfi Akraneskaupstaðar til yðar, dags. 3. apríl 2006, og fleiri gögn er málið
varða.
Framangreindar spurningar yðar varða bréf Endurskoðunarskrifstofu JÞH um “Endurskoðun á upplýsinga
kerfum vegna launagjalda Akraneskaupstaðar”, dags. 18. nóvember 2005. Í umræddu bréfi komu fram
upplýsingar, sem fengnar voru með úrtakskönnun, um ýmis atriði sem talið var að gera þyrfti úrbætur á
varðandi vinnutímaskráningu. Í kjölfar bréfsins kröfðust þér svara við eftirtöldum spurningum:
Hvers vegna komast yfirmenn upp með það að staðfesta ekki vinnuskýrslur?
Um hvaða yfirmenn er að ræða?
Hvers vegna eru laun greidd út án þess að vinnuskýrslur séu staðfestar af viðkomandi yfirmönnum?
Hvers vegna er stimplun einstakra starfsmanna ábótavant?
Hvers vegna þurfa einstakir deildarstjórar að leiðrétta mikið af eigin stimplunum?
Um hvaða deildarstjóra er að ræða?
Hvaða dæmi eru um að einstakir starfsmenn hafi ekki uppfyllt vinnuskyldu sína?
Til hvaða ráðstafana var gripið í kjölfar viðræðna endurskoðanda við bæjarritara?
Hvað hefur verið gert til að samræma reglur um stimplanir inn og út af vinnustað?
Hvað hefur verið gert til að tryggja að forstöðumenn/deildarstjórar setji inn skýringar vegna handvirkra
breytinga á stimplunum?
Álit ráðuneytisins
Mál þetta er tekið fyrir á grundvelli 102. gr. sveitarstjórnarlaga nr. 45/1998, þar sem kveðið er á um að
ráðuneytið skuli hafa eftirlit með því að sveitarstjórnir gegni skyldum sínum skv. þeim lögum og öðrum
löglegum fyrirmælum.
Í 30. gr. sveitarstjórnarlaga segir:
”Aðalmenn í sveitarstjórnum skulu vegna starfa sinna í sveitarstjórn hafa aðgang að bókum og skjölum
sveitarfélagsins og óhindraðan aðgang að stofnunum þess og starfsemi.”
Í ákvæðinu er kveðið á um mjög víðtækan rétt sveitarstjórnarmanna til aðgangs að gögnum. Réttur
sveitarstjórnarmanna er því skýr að þessu leyti og bæjarstjóra eða öðrum aðilum er almennt ekki heimilt
að takmarka þann rétt. Í þessu sambandi er rétt að vekja athygli á ákvæði 32. gr. sveitarstjórnarlaga en þar
er kveðið á um að sveitarstjórnarmenn skuli gæta þagnarskyldu um það sem þeir verða áskynja í starfi
sínu og leynt á að fara samkvæmt lögum eða eðli máls.
Í rétti sveitarstjórnarmanna til aðgangs að gögnum felst ekki fyrirvaralaus réttur til að fá svör við
spurningum sem beint er til bæjarstjóra eða sveitarstjórnarmanna. Auk þess hefur réttur til gagna almennt
verið skýrður sem réttur til fyrirliggjandi gagna, en ekki réttur til að láta útbúa eða taka saman gögn. Þar
sem í fyrrnefndu bréfi yðar til bæjarstjóra var ekki að finna beiðni um aðgang að tilgreindum
fyrirliggjandi gögnum telur ráðuneytið ekki unnt að fallast á kröfu yðar um að knýja bæjarstjóra Akraness
til að svara þeim spurningum sem beint var til hans í bréfi yðar, dags. 31. janúar 2006.
Fyrir hönd ráðherra
Guðjón Bragason (sign.)
Stefanía Traustadóttir (sign.)