Borgarbyggð - Takmörkun á málskotsrétti til ráðuneytisins, einkaréttarleg ákvörðun sveitarstjórnar
Veturliði Þór Stefánsson, lögfræðingur
8. október 2004
FEL04090030/1001
Víðigrund 34
550 SAUÐÁRKRÓKUR
Vísað er til stjórnsýslukæru yðar f.h. ábúenda jarðarinnar Álftáróss í Borgarbyggð, dags. 3.
september 2004.
Í erindi yðar er um kæruheimild vísað til 103. gr. sveitarstjórnarlaga nr. 45/1998, með síðari
breytingum, og er á því byggt að ákvörðun bæjarstjórnar Borgarbyggðar að selja jörðina í
makaskiptum hafi verið stjórnsýsluákvörðun sem kæranleg sé til ráðuneytisins. Á þennan
skilning fellst ráðuneytið ekki.
Samkvæmt 103. gr. sveitarstjórnarlaga úrskurðar ráðuneytið um ýmis vafaatriði sem upp kunna
að koma við framkvæmd sveitarstjórnarmálefna en það skerðir þó ekki rétt aðila til þess að
höfða mál fyrir dómstólum. Ákvæðið hefur verið túlkað á þann veg að ráðuneytið fjalli
eingöngu um mál er varða stjórnsýsluákvarðanir, þ.e. ákvarðanir sem hafa áhrif á réttindi eða
skyldur manna. Ákvarðanir sveitarstjórna sem eru eingöngu einkaréttarlegs eðlis falla því
almennt utan valdsviðs ráðuneytisins, nema unnt sé að benda á brot gegn meginreglum
sveitarstjórnarlaga. Sem dæmi um slíkt má nefna að hlutaðeigandi stjórnvald hafi ekki vald til
að taka ákvörðun eða einstakir sveitarstjórnarmenn séu vanhæfir til að koma að afgreiðslu
tiltekins máls.
Eignarhald og sala bújarða er ekki á meðal lögbundinna verkefna sveitarfélaga. Ákvörðun
sveitarstjórnar um að selja bújörð í eigu sveitarfélags felur að mati ráðuneytisins ekki í sér
stjórnsýsluákvörðun heldur er um að ræða einkaréttarlega ákvörðun sem ekki sætir kæru til
ráðuneytisins skv. 103. gr. sveitarstjórnarlaga. Ekki verður séð af gögnum málsins að því sé
haldið fram að við gerð makaskiptasamnings milli Borgarbyggðar og Sparisjóðs Mýrasýslu,
dags. 28. maí 2004, hafi verið brotið gegn meginreglum sveitarstjórnarlaga á þann hátt að
málið sæti kæru til ráðuneytisins.
Með vísan til framangreinds rökstuðnings er málinu vísað frá félagsmálaráðuneytinu. Tekið
skal fram að framangreind niðurstaða skerðir á engan hátt rétt yðar til að leita til dómstóla eða
umboðsmanns Alþingis.
Þetta tilkynnist yður hér með.
F. h. r.
Guðjón Bragason (sign.)
G. Dýrleif Kristjánsdóttir (sign.)
Afrit:
Landbúnaðarráðuneytið