Framvinda verkefnisins

Hlutverk heilsugæslunnar hefur verið styrkt með aukinni sjálfræðiþjónustu og þverfaglegri teymisvinnu. Til þess að bregðast við neikvæðum afleiðingum af heimsfaraldri COVID-19 og heimskreppu var farið út í frekari aðgerðir til þess að efla geðheilbrigðisþjónustu í landinu sem byggja á grunni þeirra aðgerða sem sannað hafa gildi sitt í geðheilbrigðisáætlun. Sálfræðingum var fjölgað á heilsugæslum um land allt og geðheilsuteymi voru efld með fleiri stöðugildum fagfólks. Uppbygging geðheilsuteyma um land allt er því komin vel á veg. Auk þessa hafa þrjú ný sérhæfð geðheilsuteymi tekið til starfa hjá Heilsugæslu höfuðborgarsvæðisins, þ.e. geðheilsuteymi fangelsanna, geðheilsuteymi í fjölskylduvernd og geðheilsuteymi fyrir fólk með þroskaraskanir og annan geðrænan vanda. Sett hafa verið fram viðmið fyrir fjölmiðla um hvernig unnt er að fjalla um geðheilbrigðismál án þess að alið sé á fordómum. 

Verið er að fylgja eftir aðgerðaáætlun til að draga úr sjálfsvígum og staða verkefnisstjóra um framkvæmd áætlunarinnar hefur verið tryggð út árið 2021. Einnig var Pieta- samtökunum veittur 6 milljóna króna styrkur árið 2020 til að efla þjónustu sína.

Skimanir  fyrir geðheilsuvanda hafa verið auknar í skólaheilsugæslu. Fyrirhugað er að hefja rafræna skimun fyrir kvíða og þunglyndi á meðal barna í 7. bekk á landsvísu árið 2021. Geðheilsuteymi Heilsugæslu höfuðborgarsvæðisins er að innleiða verkefnið Tölum um börnin. Þróunarmiðstöð íslenskrar heilsugæslu var falið að útbúa fræðsluefni um geðheilbrigði fyrir starfsfólk hjúkrunarheimila, fræðsluefni fyrir heilbrigðisstarfsfólk um neyslu- og fíknivanda og geðræktarefni fyrir börn í skólum.

Á fjórða þúsund manns tóku þátt í geðheilbrigðisþingi 2020 og vinnustofum sem haldið var á vefnum í desember 2020. Markmið þingsins og vinnustofanna var að móta framtíðarsýn í geðheilbrigðismálum til ársins 2030. Heilbrigðisráðuneytið birti í júní 2021 til umsagnar skýrslu um framtíðarsýn í geðheilbrigðismálum til ársins 2030 með áherslu á árangur, skilvirkni og gæði þjónustunnar. Skýrslan er afrakstur vinnu sem fram fór í tengslum við fjölmennt geðheilbrigðisþing sem heilbrigðisráðherra efndi til 9. desember síðastliðinn.

Ábyrgð

Heilbrigðisráðuneytið

Kafli

Sterkt samfélag