Framvinda verkefnisins

Fyrir útgöngu Bretlands úr ESB voru gerðir samningar við Bretland bæði vegna útgönguskilmála og einnig til að tryggja kjarnahagsmuni vegna hugsanlegrar útgöngu án samnings. Allar viðbúnaðargerðir ESB til að lágmarka tjón á innri markaðnum vegna útgöngu voru jafnframt teknar upp í EES-samninginn. Við lok aðlögunartímabilsins 1. janúar 2021 tók gildi bráðabirgðafríverslunarsamningur sem tryggir kjarnahagsmuni Íslands vegna vöruviðskipta þangað til nýr fríverslunarsamningur tekur gildi. Loftferðasamningur tók gildi á sama tíma auk þess sem að samstarfsyfirlýsing á sviði sjávarútvegs hefur verið gerð. Þá var Samkomulag um samstarf Íslands og Bretlands á alþjóðavettvangi á ýmsum forgangssviðum (Vision 2030) undirritað í maí 2020. Tilkynnt var um lok viðræðna um yfirgripsmikinn fríverslunarsamning við Bretland 4. júní 2021. Samningurinn mun taka við af bráðabirgðafríverslunarsamningnum en ráðgert er að hann verði lagður fyrir Alþingi til samþykktar í haust. Samningaviðræður standa yfir um gagnkvæm tímabundin dvalar- og atvinnuleyfi fyrir ungt fólk, viðræður á sviði almannatrygginga og heilbrigðisþjónustu auk þess sem viðræður um samstarf á sviði innri öryggismála er í farvatninu. Áfram verður þó unnið að samningum um tímabundin dvalar- og atvinnuleyfi fyrir ungt fólk, samningum um almannatryggingar og heilbrigðisþjónustu og samstarf á sviði innri öryggismála.

Ábyrgð

Utanríkisráðuneytið

Kafli

Alþjóðamál