Viðræður við hollensk orkufyrirtæki og stjórnvöld um orkumál

Iðnaðar- og viðskiptaráðuneyti
Nr. 1/1997


1. Viðræður við hollensk stjórnvöld

Finnur Ingólfsson, iðnaðar- og viðskiptaráðherra og Hans Wijers, efnahagsmálaráðherra Hollands áttu fund í Haag 15. þ.m. þar sem farið var yfir samskipti Íslands og Hollands á sviði orkumála og mál er varða framkvæmd tilskipunar Evrópusambandsins um sameiginlegan raforkumarkað í Evrópu. Hollensk yfirvöld eru í formennsku fyrir Evrópusambandið á árinu 1997. Af Íslands hálfu var lögð áhersla á sérstöðu íslensks raforkumarkaðar, sem eðlilegt væri að taka tillit til.

Á fundinum var sérstaklega rætt um áherslu hollensku ríkisstjórnarinnar á að skapa sérstakan markað fyrir raforku sem framleidd er úr endurnýjanlegum orkugjöfum, en slík orka er nú þegar seld á hærra verði en önnur orka. Ríkisstjórnin hyggst auka hlut slíkrar orku, sem er nú um 1-2% af heildarnotkun, í 10% árið 2010. Í því sambandi var rætt um tengingu íslenskra raforkukerfisins við orkumarkaði í Evrópu og sölu á raforku frá Íslandi um sæstreng til hollenskra orkufyrirtækja. Ákveðið var að taka upp nánara samstarf milli stjórnvalda og Hollands og Íslands til að auka á samskipti þjóðanna í atvinnuppbyggingu.

2. Viðræður við hollensk orkufyrirtæki

Í tengslum við fund iðnaðar- og viðskiptaráðherra og efnahagsmálaráðherra Hollands fóru þann 14. og 15. janúar sl. fram viðræður milli iðnaðar- og viðskiptaráðuneytis og þeirra þriggja fyrirtækja sem eiga aðild að ICENET-hópnum. Fyrirtækin hafa á undanförnum árum kannað hagkvæmni þess að leggja sæstreng milli Íslands og Evrópu með það að markmiði að bjóða raforku framleidda úr endurnýjanlegum orkulindum á markaði í Hollandi. Af Íslands hálfu var lögð sérstök áhersla á að fram færi heildarathugun á verkefninu í samstarfi við þau orkufyrirtæki í Hollandi og Þýskalandi sem sýnt hafa málinu áhuga. Eftirfarandi þættir yrðu lagðir til grundvallar frekari ákvörðunar af Íslands hálfu:

• Jákvæð áhrif raforkuflutnings um sæstreng á uppbyggingu orkuiðnaðar á Íslandi og betri nýtingu orkulindanna út frá íslenskum hagsmunum.
• Jákvæð áhrif sæstrengs á möguleika samningsaðila til að uppfylla framtíðarskuldbindingar loftslagssamnings Sameinuðu þjóðanna um að draga úr losun lofttegunda sem valda gróðurhúsaáhrifum.