Samráðsfundir Íslands, Grænlands og Færeyja

Á fundi Davíðs Oddssonar forsætisráðherra og Jonathan Motzfeldt formanns grænlensku landsstjórnarinnar í Nuuk í dag var gefin út hjálögð yfirlýsing.

Þar kemur m.a. fram að ákveðið hafi verið, í samráði við lögmann Færeyja, að efna til reglubundinna samráðsfunda forsætisráðherra Íslands, lögmanns Færeyja og formannns landsstjórnar Grænlands til að stuðla að auknu samstarfi hinna vestlægu Norðurlanda. Jafnframt var ákveðið að fyrsti fundurinn verði haldinn í Reykjavík í haust.

Í Reykjavík, 11. ágúst 1998.

Yfirlýsing

forsætisráðherra Íslands og formanns grænlensku landstjórnarinnar
um samskipti Íslands og Grænlands

Forsætisráðherra Íslands og formaður grænlensku heimastjórnarinnar lýsa yfir ánægju með þau ágætu
samskipti sem eru milli landanna. Samstarf þeirra hefur verið í örri þróun og vilji er til þess að efla það enn frekar og láta það ná til nýrra sviða þar sem hagsmunir landanna fara saman.

1. Um sjávarútvegsmál hefur verið gerður samstarfssamningur sem leggur grunn að enn nánara samstarfi landanna í auðlinda- og umverfismálum á komandi árum.

2. Viðskipti milli landanna hafa eflst og möguleikar eru á að auka þau enn frekar.

3. Samstarf sem þegar hefur verið komið á milli Íslands og Grænlands í heilbrigðismálum gengur vel. Þetta samstarf verður eflt og stefnt að því að það nái til aukinnar samvinnu um læknisþjónustu og til starfsmannaskipta í heilbrigðisþjónustu. Einnig verður skipst á upplýsingum um þróun og stefnu í heilbrigðismálum í löndunum tveimur.

4. Ísland og Grænland munu upplýsa hvort annað um þróun orkumála að því er lýtur að endurnýjanlegri orku og skiptast á upplýsingum um áætlanir á þessu sviði.

5. Samstarf Íslands og Grænlands á vettvangi Norðurlandaráðs mun hafa vaxandi þýðingu. ríkur vilji er til þess að í norrænu samstarfi leggi löndin áherslu á málefni hinna vestlægu Norðurlanda og norðurslóða.

6. Samvinna landanna í ferðamálum hefur farið vaxandi og ljóst er að bæði löndin hafa haft verulegan hag af henni. Þýðingarmikið er að þessu góða samstarfi verði haldið áfram og það aukið, enda er að vænta fjölgunar ferðamanna til landanna. Samstarf vegna árþúsundamótaársins 2000 verður mikilvægt til að efla samstarf á sviði ferðamála.

7. Löndin munu halda áfram hinni árangursríku samvinnu sem komið hefur verið á í menningarmálum með samstarfssamningi Íslands, Færeyja og Grænlands árið 1996.

8. Árþúsundmótaárið 2000 munu löndin fagna því að þúsund ár eru liðin frá því er norrænir menn fundu Ameríku. Af því tilefni hefur verið komið á sérstakri samvinnu landanna sem miðar að því að vekja athygli umheimsins á sameiginlegum arfi þjóðanna. Til að minnast sögulegra tengsla landanna mun ríkisstjórn Íslands leggja fram 20 milljónir íslenskra króna til uppbyggingar á bæ Eiríks rauða í Brattahlíð við Eiríksfjörð. Að auki er fyrirhugað margvíslegt samstarf á milli landanna í tilefni þúsund ára afmælis landafundanna. Þar má nefna eftirfarandi:

• Samstarf um kynningarátak vegna siglingar víkingaskipsins Íslendings í nýju húsnæði American Scandinavian Foundation í New York um mánaðarmótin september október árið 2000. Hápunktur þeirrar kynningar verður dagur Leifs Eiríkssonar, 9. október. Þá er þessu sambandi stefnt að víðtækri kynningu þátttökulandanna í siglingunni með sérstakri áherslu á ferðamál.
• Gerð kennslu- og margmiðlunarefnis fyrir börn um víkingaöldina og sögu beggja landanna.
• Útgáfa sérstaks Leift Eiríkssonar frímerkis samtímis á Grænlandi og Íslandi.

9. Til að stuðla að auknu samstarfi hinna vestlægu Norðurlanda hefur verið ákveðið í samráði við lögmann Færeyja og formanns grænlensku landstjórnarinnar. Ákveðið hefur verið að fyrsti fundurinn verði haldinn í Reykjavík að hausti.