Nr. 119, 3. desember 1999 Haustfundur varnarmálaráðherra Atlantshafsbandalagsins í Brussel.
 |
|
FRÉTTATILKYNNING
frá utanríkisráðuneytinu
________
Nr. 119
Haustfundur varnarmálaráðherra aðildarríkja Atlantshafsbandalagsins var haldinn í Brussel 2. desember sl.
Á fundinum var helst fjallað um ástand og horfur í Kosóvó og Bosníu-Hersegóvínu, þ.m.t. starfsemi alþjóðlegu öryggissveitanna (KFOR) og stöðugleikasveita bandalagsins (SFOR). Fjallað var um samskipti bandalagsins við Rússland og Úkraínu og lýst áhyggjum vegna þróunar mála í norðurhluta Kákasus-héraðs. Í því samhengi var fjallað um afvopnunarmál, m.a. aðlögun og framkvæmd samningsins um hefðbundinn herafla í Evrópu (CFE). Lögð var áhersla á frumkvæði til eflingar varnargetu bandalagsríkja (DCI) og vísað til væntanlegrar ákvarðanatöku innan Evrópusambandsins um aukna varnargetu aðildarríkja þess sem mikilvægs þáttar í viðleitni bandalagsins. Lýst var vonum um nánara samstarf bandalagsins og ESB á sviði öryggis- og varnarmála.
Á fundinum og í undirbúningi hans lögðu fulltrúar Íslands áherslu á nauðsyn heildstæðrar framkvæmdar ákvarðana leiðtogafundar bandalagsins í Washington D.C. um Evrópusamstarfið á sviði öryggis- og varnarmála. Það fæli m.a. í sér að samkvæmni þyrfti að vera í annars vegar ákvarðanatöku bandalagsins um hugsanlegan aðgang ESB að búnaði og liðsafla þess og hins vegar ákvarðanatöku ESB um þátttökurétt bandalagsríkja utan sambandsins í mótun og framkvæmd sameiginlegrar evrópskrar öryggis- og varnarmálastefnu. Miklu skipti að niðurstöður fyrirhugaðs leiðtogafundar ESB í Helsinki tryggðu slíka samkvæmni.
Í fjarveru utanríkisráðherra, Halldórs Ásgrímssonar, sátu fundinn fyrir Íslands hönd Gunnar Pálsson, fastafulltrúi hjá Atlantshafsbandalaginu, og Benedikt Ásgeirsson, skrifstofustjóri varnarmálaskrifstofu utanríkisráðuneytisins.
Hjálagt eru yfirlýsingar funda varnarmálaráðherra og varnaráætlananefndar bandalagsins.
- SCAN0908.TIFUtanríkisráðuneytið
Reykjavík, 3. desember 1999.