Nr. 126, 16. desember 1999. Haustfundur Evró-Atlantshafsráðsins í Brussel 16. desember 1999.
![]() |
![]() |
FRÉTTATILKYNNING
frá utanríkisráðuneytinu
________
Nr. 126
Haustfundur Evró-Atlantshafsráðsins, þar sem koma saman 19 utanríkisráðherrar Atlantshafsbandalagsríkjanna og 26 samstarfsríkja, var haldinn í Brussel í dag, 16. desember 1999. Halldór Ásgrímsson, utanríkisráðherra sótti fundinn fyrir Íslands hönd. Á fundinum var Írland, sem nýlega gerðist aðili að ráðinu, boðið sérstaklega velkomið.
Í kjölfar ávarps Dr. Bernhards Kouchner, sérstaks fulltrúa Sameinuðu þjóðanna í Kosovo, þar sem hvatt var til enn frekara framlags af hálfu aðildar- og samstarfsríkja til uppbyggingarstarfsins í héraðinu, lýstu ráðherrarnir ánægju með þann árangur sem náðst hefur í samstarfi þjóðanna 45 í Kosovo. Á annan tug friðargæsluliða samstarfsríkjanna hafa starfað innan alþjóðlegra öryggissveita Atlantshafsbandalagsins þar. Lýstu ráðherrarnir vilja til að auka enn frekar samstarfið á þessu sviði og hyggjast samstarfsríkin efla liðsafla og búnaði til þátttöku bæði í friðargæsluaðgerðum á vegum Atlantshafsbandalagsins og innan samstarfs í þágu friðar.
Einnig var rætt um ástandið í Tjétsníu og lýstu margir ráðherrar samstarfsríkjanna, sem mörg hver eru nágrannaríki Rússlands, miklum áhyggjum yfir að óstöðugleiki gæti breiðst út til nærliggjandi svæða, bæði Kákásus-lýðveldanna og ríkja Mið-Asíu.
Almennt lýstu ráðherrarnir ánægju með samstarfið á síðasta ári með þeim ásetningi að gera samstarfið skilvirkara en áður og bæta árangur núverandi framkvæmdaáætlana fyrir samstarfsþjóðir.
Hjálagt sendist yfirlýsing fundarins en til frekari upplýsinga er bent á heimasíðu bandlagsins á Internetinu sem er www.nato.int
![](/media/utanrikisraduneyti-media/media/embedded/wpp1882/0.B0E.gif)
Utanríkisráðuneytið
Reykjavík, 16. desember 1999.