Nr. 029, 16. maí 2000. Utanríkis- og varnarmálaráðherrafundur VES.
![]() |
![]() |
FRÉTTATILKYNNING
frá utanríkisráðuneytinu
________
Nr. 029
Íslensk stjórnvöld leggja áherslu á að komið verði til móts við sjónarmið evrópsku Atlantshafsbandalagsríkjanna (NATO) utan Evrópusambandsins (ESB) um rétt þeirra til þátttöku í nýjum stofnunum sambandsins á sviði öryggis- og varnarmála, á grundvelli núverandi fyrirkomulags innan Vestur-Evrópusambandsins (VES). Að því gefnu hafa íslensk stjórnvöld í hyggju að kanna hvað þau geti lagt af mörkum til sameiginlegra friðarstarfa á vegum ESB í framtíðinni. Þetta kom fram í meðfylgjandi ávarpi sem fastafulltrúi Íslands hjá VES, Dr. Gunnar Pálsson, flutti á sameiginlegum fundi utanríkis- og varnarmálaráðherranna í gær, en fundurinn er haldinn í Óportó í Portúgal, 15. - 16. maí.
Helsta viðfangsefni ráðherrafundarins var fyrirsjáanlegar breytingar í öryggismálasamstarfi í Evrópu, en semja þarf m.a. um formleg samskipti NATO og ESB og möguleika sambandsins á aðgangi að liðsafla og búnaði NATO. Á fundinum var ástandið á Balkanskaga einnig rætt, sem og árangur sameiginlegrar viðbragðsæfingar NATO og VES á sviði hættuástandsstjórnunar í febrúar. Yfirlýsing ráðherrafundarins fylgir.
Auk fastafulltrúa Íslands hjá VES, sótti Hjálmar W. Hannesson, sendiherra og skrifstofustjóri alþjóðaskrifstofu utanríkisráðuneytisins, fundinn í fjarveru Halldórs Ásgrímssonar, utanríkisráðherra.
Einnig er hægt að nálgast upplýsingar um fundinn á heimasíðu Vestur-Evrópusambandsins http://www.weu.int
![](/media/utanrikisraduneyti-media/media/embedded/wpp1338/0.1850.gif)
![](/media/utanrikisraduneyti-media/media/embedded/wpp1338/0.3246.gif)
Utanríkisráðuneytið
Reykjavík, 16. maí 2000.