Nr. 12/2001. Fundir fjármálaráðherra í Brussel

Fundir fjármálaráðherra í Brussel

Fjármálaráðherra, Geir H. Haarde, átti í gær fund með fjármálaráðherra Belgíu, Didier Reynders, og tveimur meðlimum framkvæmdastjórnar ESB þeim Frederik Bolkestein, sem fer með skattamál og málefni innri markaðarins, og Pedro Solbes Mira, sem fer með efnahags- og peningamál. Einnig átti fjármálaráðherra fund með þeim Knut Almestad, forseta Eftirlitsstofnunar EFTA (ESA), og William Rossier, aðalframkvæmdastjóra EFTA.

Á fundunum var staða efnahagsmála innan ESB-ríkjanna rædd svo og ýmis sérstök málefni er varða skatta og lífeyrismál. Fram kom m.a. að ýmsar breytingar eru fyrirhugaðar innan ESB á sviði skattamála, þ.á m. með það að leiðarljósi að gera atvinnu- og fyrirtækjaumhverfi ríkjanna betur samkeppnisfært.

Þá var staða evrunnar til umfjöllunar og greindi fjármálaráðherra Belgíu, sem einnig er formaður í svokölluðum evruhóp tólf þjóða innan ESB, frá stöðu þeirra mála.

Hjálagt fylgja myndir af fundunum. Mynd 8 er með Bolkestein, mynd 16 með Solbes Mira og mynd 10 með þeim Rossier (á hægri hönd Geirs) og Almestad (á vinstri hönd ráðherrans).