Almennar kosningar til sveitarstjórna verða laugardaginn 25. maí 2002

Almennar kosningar til sveitarstjórna verða laugardaginn 25. maí 2002, í samræmi við 1. gr. laga um kosningar til sveitarstjórna nr. 5/1998. Felld hefur verið brott heimild eldri laga til að fresta kjördegi í dreifbýli fram til annars laugardags í júní. Þótti möguleiki á tveimur kjördögum úreltur miðað við nútímaaðstæður. Mun kosning því fara fram í öllum sveitarfélögum þann 25. maí 2002.

Samkvæmt 1. mgr. 1. gr. laganna fara almennar sveitarstjórnarkosningar fram síðasta laugardag í maí mánuði sem ekki ber upp á laugardag fyrir hvítasunnu. Kosningarnar fara fram á fjögurra ára fresti og fóru þær síðast fram 23. maí 1998.