Friðlýsing Árnahellis í Leirahrauni
Umhverfisráðherra, Siv Friðleifsdóttir, undirritaði í dag friðlýsingu Árnahellis í Leitahrauni. Árnahellir fannst árið 1985 og er hann annar hellir landsins sem friðlýstur er með sérstakri friðlýsingu en Jörundur í Lambahrauni var friðlýstur 1985. Auk þeirra eru nokkrir hellar á friðlýstum svæðum sem njóta friðunar. Að tillögu Hellarannsóknarfélags Íslands lagði Náttúruvernd ríkisins til við umhverfisráðuneytið að hellirinn yrði friðlýstur og hafa þessir aðilað unnið að friðlýsingu hellisins í samvinnu við landeigendur og sveitarfélagið Ölfus. Árnahellir er meðal merkilegri hraunhella jarðar vegna ósnortinna hraunmyndana sem óvíða finnast annars staðar. Hellirinn er um 150 m langur og liggur á um 20 m dýpi og er breidd hans um og yfir 10 m en lágt er til lofts. Dropsteinum Árnahellis hefur verið líkt við frumskóg en þeir lengstu eru yfir metri á hæð og um 7 cm í þvermál og eru þeir í hópum eða breiðum á hellisgólfinu. |
![]() Ljósmynd Hellarannsóknarfélag Íslands |
Loftið í hellinum er víða þakið hraunstráum 5-10 mm í þvermál, sum hol að innan og önnur með þunnri gifshúð, en lengd þeirra er allt að 60 cm að því er segir í bókinni Hraunhellar á Íslands eftir Björn Hróarsson. Með friðlýsingunni eru heimsóknir í hellinn og framkvæmdir á svæðinu sem raskað geta hellinum óheimilar nema með leyfi Náttúruverndar ríkisins eða umsjónaraðila hellisins. Hellinum var lokað árið 1995 til þess að koma í veg fyrir skemmdir. Fréttatilkynning nr. 16/2002
|
![](/media/umhverfisraduneyti-media/media/embedded/wpp1315.html/0.1330.gif)