Átak gegn verslun með konur - ráðstefna

Á fundi jafnréttismálaráðherra frá Norðurlöndum og Eystrasaltsríkjunum hinn 15. júní 2001 sem átti sér stað á ráðstefnunni Konur og lýðræði (Women and Democracy) í Vilnius í Litháen var lögð fram tillaga um sameiginlega baráttu Norðurlandanna og Eystrasaltsþjóðanna gegn verslun með konur (mansal). Var í framhaldinu ákveðið að efna til sameiginlegs átaks jafnréttis- og dómsmálaráðherra nefndra ríkja sem fælist í að upplýsa almenning um viðfangsefnið og vandamál sem því tengdust. Hér á landi hefur skipulagning verkefnisins því verið sameiginlegt verkefni félagsmálaráðuneytis og dómsmálaráðuneytis, auk þess sem settur var á laggirnar undirbúningshópur ýmissa aðila til að undirbúa átakið hér á landi. Verkefnisstjórar átaksins hér á landi eru Ásta S. Helgadóttir, lögfræðingur í félagsmálaráðuneyti og Dís Sigurgeirsdóttir, lögfræðingur í dómsmálaráðuneyti.

Ákveðið hefur verið að átakið á Íslandi feli í sér útgáfu aukablaðs með Morgunblaðinu sem mun koma út laugardaginn 22. febrúar nk. Einnig verður haldin ráðstefna föstudaginn 28. febrúar nk. á Grand Hótel í Reykjavík og má sjá dagskrá hennar hér að neðan.