Ráðstefna um alþjóðlega baráttu gegn mansali

Nr. 011

Utanríkisráðuneytið stendur fyrir ráðstefnu, í samvinnu við dóms- og kirkjumálaráðuneytið, um alþjóðlega baráttu gegn mansali föstudaginn 19. mars nk. Ráðstefnan verður haldin í Norræna húsinu kl. 13:00-17:00.

Mansal er sú skipulagða alþjóðlega glæpastarfsemi sem er í mestum vexti í heiminum í dag að mati Sameinuðu þjóðanna en allt að fjórar milljónir manna, einkum konur og börn, eru seldar mansali ár hvert, oftast til kynlífsþrælkunar. Á ráðstefnunni verður lögð áhersla á baráttuna gegn mansali í alþjóðlegu samhengi með áherslu á starfsemi Öryggis- og samvinnustofnunar Evrópu (ÖSE). Einnig verður gerð grein fyrir starfsemi alþjóðlegs vinnuhóps gegn mansali á vegum Stöðugleikasáttmálans fyrir Suðaustur-Evrópu (Stability Pact). Ennfremur fer fram kynning á verkefni jafnréttis- og dómsmálaráðherra Norðurlandanna og Eystrasaltsríkjanna um átak gegn verslun með konur. Á ráðstefnunni verður jafnframt fjallað um samning Sameinuðu þjóðanna gegn skipulagðri glæpastarfsemi.

Halldór Ásgrímsson, utanríkisráðherra, mun flytja inngangsávarp við upphaf ráðstefnunnar en aðrir ræðumenn eru Stephan Minikes, fastafulltrúi Bandaríkjanna hjá ÖSE, dr. Helga Konrad, formaður alþjóðlegs vinnuhóps gegn mansali sem starfar á vegum Stöðugleikasáttmálans fyrir Suðaustur-Evrópu (Stability Pact), Dís Sigurgeirsdóttir lögfræðingur, hjá dóms- og kirkjumálaráðuneyti, Björg Thorarensen, prófessor við lagadeild Háskóla Íslands og Eyjólfur Kristjánsson, lögfræðingur hjá sýslumannsembættinu á Keflavíkurflugvelli.

Að loknum erindum málshefjenda verða fyrirspurnir og umræður. Ráðstefnan fer fram á íslensku og ensku og er öllum opin.

Hjálagt fylgir dagskrá ráðstefnunnar:

Utanríkisráðuneytið

Reykjavík, 17. mars 2004.