Greiðsluafkoma ríkissjóðs janúar - febrúar 2004. Greinargerð: 29. apríl 2004.

Mánaðaruppgjör ríkissjóðs eru nú með breyttu sniði og er framsetningin færð nær almennum sjóðstreymisyfirlitum. Meginbreytingin við samanburð á fyrri uppgjörum liggur í breyttri færslu launagjalda. Einnig eru reikningar stofnana sem eru í bókhaldsþjónustu Fjársýslu ríkisins nú bókfærðir um leið og þeir berast en ekki gjaldfærðir við greiðslu eins og áður var. Breytingarnar leiða til um 5 milljarða króna hærri útgjaldafærslu í mánuðunum janúar-nóvember en áður var. Útgjöld í desember lækka hins vegar að sama skapi. Þar sem uppgjörið nær aðeins til tveggja mánaða er samanburður við fyrra ár háður óvissu vegna tilfærslu milli mánaða og á það jafnt við um tekjur og útgjöld. Þetta getur valdið óeðlilega miklum sveiflum í einstaka liðum.

Samkvæmt febrúaruppgjöri var handbært fé frá rekstri fyrir fyrstu tvo mánuði ársins jákvætt um 7,1 milljarð króna sem er 5 milljörðum hagstæðari útkoma en á sama tíma í fyrra en heldur lakara en áætlanir gerðu ráð fyrir. Tekjujöfnuður reyndist í samræmi við áætlanir og hreyfingar á viðskiptareikningum um 0,8 milljörðum króna hagstæðari.

Heildartekjur ríkissjóðs námu 48,7 milljörðum króna og hækka um 4,6 milljarða króna frá fyrra ári, eða um 10,7%. Skatttekjur ríkissjóðs námu 45,7 milljörðum króna og hækkuðu um 9,3% að raungildi á milli ára og um 2,5 milljarða frá áætlun. Innheimta tekjuskatta einstaklinga nam 10,6 milljörðum króna sem er um 1 milljarði króna meira en á sama tíma í fyrra og innheimta tekjuskatta lögaðila jókst um 650 milljónir króna. Innheimta fjármagnstekjuskatts jókst um 9,3% sem jafngildir 6,8% raunhækkun á milli ára og svipaða sögu er að segja um innheimtu tryggingagjalda sem jókst um 9,7% að raungildi miðað við sama tímabil í fyrra. Til samanburðar má nefna að launavísitala Hagstofunnar hækkaði um 3,3% á sama tímabili. Innheimta eignaskatta á fyrstu tveim mánuðum ársins var 24,5% meiri en á sama tíma í fyrra sem jafngildir 21,7% raunhækkun og veltuskattar ríkissjóðs jukust um 2 milljarða króna milli ára eða um 7,4% að raungildi. Munar þar mestu um innheimtu tekna af virðisaukaskatti en hún jókst um 10,5% að raungildi milli ára.

Gjöld fyrstu tvo mánuði árins námu 44,8 milljörðum króna og að teknu tilliti til áðurnefndra færslubreytinga launa þá er um að ræða lækkun gjalda um 2½ milljarð. Þar munar langmestu um að vaxtagjöldin lækka um 3,9 milljarða milli ára þar sem að stór flokkur spariskírteina var á gjalddaga í febrúar 2003. Í samanburði við áætlun eru gjöldin 2 milljörðum króna hærri en gert var ráð fyrir. Þar er að mestu um tilfærslu milli mánaða að ræða sem aðallega kemur fram hjá almannatryggingum og að hluta til í heilbrigðismálum.

Lántökur námu 17,6 milljörðum króna en afborganir voru 13,9 milljarðar. Þá voru greiddar 1,3 milljarðar króna til Lífeyrissjóðs starfsmanna ríkisins í því skyni að lækka framtíðarskuldbindingar ríkissjóðs. Handbært fé jókst um 8,2 milljarða á fyrstu tveimur mánuðum ársins.

Sjóðstreymi ríkissjóðs janúar-febrúar

(Í milljónum króna)

Lántökur námu 17,6 milljörðum króna en afborganir voru 13,9 milljarðar. Þá voru greiddar 1,3 milljarðar króna til Lífeyrissjóðs starfsmanna ríkisins í því skyni að lækka framtíðarskuldbindingar ríkissjóðs. Handbært fé jókst um 8,2 milljarða á fyrstu tveimur mánuðum ársins.

Tekjur ríkissjóðs janúar-febrúar

(Í milljónum króna)

Gjöld ríkissjóðs janúar-febrúar

(Í milljónum króna)