Greiðsluafkoma ríkissjóðs janúar - apríl 2004

Greiðsluafkoma ríkissjóðs janúar - apríl 2004

Mánaðaruppgjör ríkissjóðs eru nú með breyttu sniði og hefur framsetning afkomuyfirlits verið færð nær almennum sjóðstreymisyfirlitum. Við samanburð á rekstrarafkomu fyrri ára verður að hafa í huga að færsla gjalda er nú nær rekstrargrunni en áður. Þetta hefur þau áhrif að gjöldin verða um 5 milljörðum króna hærri en ella sem veldur því að tölur eru ekki samanburðarhæfar milli ára. Tekjur ríkissjóðs eru hins vegar gerðar upp með sama hætti og áður.

Samkvæmt apríluppgjöri er handbært fé frá rekstri neikvætt um 2,7 milljarða króna sem er 0,2 milljörðum lakari útkoma en á sama tíma í fyrra. Áætlanir gerðu ráð fyrir um 0,4 milljarða jákvæðri stöðu. Tekjujöfnuður reyndist 3 milljörðum hagstæðari en áætlað var en hreyfingar á viðskiptareikningum um 6,1 milljarði króna óhagstæðari.

Heildartekjur ríkissjóðs námu rúmlega 91 milljarði króna á fyrstu fjórum mánuðum þessa árs sem er nánast sama fjárhæð og á sama tímabili síðasta árs. Innheimta skatttekna jókst hins vegar töluvert, eða um 14,4% sem jafngildir 12% hækkun að raungildi milli ára. Skýringin á þessum mun er sú að tekjur af sölu eigna námu um 10,8 milljörðum króna á fyrstu fjórum mánuðum ársins 2003 en einungis 0,3 milljörðum króna í ár. Innheimta tekjuskatta einstaklinga nam um 21 milljarði króna sem er um 2,3 milljörðum króna meira en á sama tíma í fyrra og innheimta tekjuskatta lögaðila jókst um 1,9 milljarða króna. Innheimta fjármagnstekjuskatts jókst um 7,5% sem jafngildir 5,2% raunhækkun á milli ára og innheimta tryggingagjalda jókst um 3,3% að raungildi. Þess má geta að launavísitala Hagstofunnar hækkaði um 3,6% á sama tímabili. Tekjur ríkissjóðs af virðisaukaskatti jukust um 3,7 milljarða króna frá sama tíma í fyrra sem jafngildir 12,5% raunhækkun. Innheimta annarra skatta á vöru og þjónustu jókst einnig eða um 6,3% að raungildi. Þetta endurspeglar áframhaldandi aukin umsvif í efnahagslífinu, einkum í neysluútgjöldum heimilanna.

Gjöld fyrstu fjóra mánuði ársins nema 90,2 milljörðum króna og hækka um 6,5 milljarð milli ára, en að teknu tilliti til breyttrar lotunar gjalda nemur hækkunin um 1½ milljarði króna. Skýrist hækkunin nær alfarið af auknum greiðslum til almannatrygginga eða um 2,7 milljarða, þar sem lífeyristryggingar vega þyngst. Á móti vegur að vaxtagjöldin lækka um 0,9 milljarða milli ára þar sem að stór flokkur spariskírteina var á gjalddaga í febrúar 2003. Í samanburði við áætlun eru greiðslur 1,8 milljörðum hærri en gert var ráð fyrir. Það er að hluta til um tilfærslu milli mánaða að ræða, sem aðallega kemur fram hjá almannatryggingum, auk þess sem verið er að nýta inneignir fyrra árs í vegaframkvæmdum.

Lántökur námu 32 milljörðum króna en afborganir voru 25 milljarðar. Þá voru greiddar 2,5 milljarðar króna til Lífeyrissjóðs starfsmanna ríkisins í því skyni að lækka framtíðarskuldbindingar ríkissjóðs. Greiðsluafgangur jókst um 5 milljarða á fyrstu fjórum mánuðum ársins.

Sjóðstreymi ríkissjóðs janúar-apríl

(Í milljónum króna)

Tekjur ríkissjóðs janúar-apríl

(Í milljónum króna)