Breyting á reglugerð um bókhald og ársreikninga sveitarfélaga

Reglugerð um bókhald og ársreikninga sveitarfélaga nr. 944/2000 hefur verið breytt með reglugerð nr. 561/2004. Meginbreytingin varðar skil sveitarfélaga á fjárhagsáætlunum og ársreikningum til félagsmálaráðuneytisins. Er sveitarfélögum nú gert að skila félagsmálaráðuneytinu fjárhagsáætlunum, þriggja ára áætlunum og ársreikningum á rafrænu formi sem uppfyllir kröfur sem ráðuneytið setur.

Einnig eru ákvæði 9. og 11. gr. reglugerðarinnar löguð að breytingum sem gerðar voru á VI. kafla sveitarstjórnarlaga með lögum nr. 74/2003, þar sem kveðið er á um tímaramma á afgreiðslu sveitarstjórnar á fjárhagsáætlun næsta árs og þriggja ára áætlun.

Breytingin var gerð að fenginni umsögn Sambands íslenskra sveitarfélaga og hefur hún þegar tekið gildi.