Afhending trúnaðarbréfs

Stefán Skjaldarson, sendiherra, afhenti þann 2. nóvember sl. emirnum af Kúveit, hans hátign Sheikh Jaber al-Ahmed al Jaber Al Sabah, trúnaðarbréf sitt sem sendiherra Íslands í Kúveit með aðsetur í Osló.  Stefán er fyrsti sendiherra Íslands í Kúveit en stofnað var til stjórnmálasambands við furstadæmið árið 1996.

Í tilefni  afhendingarinnar átti Stefán fundi með ráðamönnum í Kúveit.  Á fundunum var kynnt framboð Íslands til setu í öryggisráði Sameinuðu þjóðanna fyrir tímabilið  2009 og 2010. Staða mála í Mið-Austurlöndum var rædd og fram kom þakklæti vegna stuðning Íslands við kúveisku þjóðina á erfiðum tímum.

Samskipti Íslands og Kúveit hafa ekki verið mikil hingað til.  Sendiherrann og ráðamenn voru sammála um að ástæða væri til að kanna nýja samstarfsfleti, ekki síst á sviði viðskipta. Fyrstu skrefin í þeim efnum gætu falist í gerð samninga um vernd fjárfestinga, tvísköttun og flugmál.