Málþing um fljótandi skil leik- og grunnskóla

Til leikskóla, grunnskóla, skólaskrifstofa, framhaldsskóla, kennaramenntunarstofnana og ýmissa annarra hagsmunaaðila

Efni: Málþing um fljótandi skil leik- og grunnskóla

Menntamálaráðuneytið boðar til málþings um fljótandi skil leik- og grunnskóla föstudaginn 1. apríl nk. frá kl. 13.00-17.00 í Kennaraháskóla Íslands, Skriðu.

Markmiðið með málþinginu er að varpa ljósi á ýmis fagleg sjónarmið er varða einkum elstu börn í leikskóla og yngstu börn í grunnskóla og ræða hvernig ná megi meiri samfellu milli þessara skólastiga með hagsmuni nemendanna að leiðarljósi.

Málþingið er haldið í samvinnu við Samband íslenskra sveitarfélaga, Félag leikskólakennara, Félag grunnskólakennara, Eflingu - stéttarfélag, Skólastjórafélag Íslands og Rannsóknarstofnun Kennaraháskóla Íslands. Málþingið er öllum opið en einkum ætlað skólastjórnendum og kennurum á leik- og grunnskólastigi, stefnumótunaraðilum í menntamálum, kennaramenntunarstofnunum og fulltrúum foreldra og nemenda. Málþingið er þátttakendum að kostnaðarlausu.

Meðfylgjandi er dagskrá málþingsins en hún er einnig aðgengileg á heimasíðu menntamálaráðuneytisins, www.menntamalaraduneyti.is og www.menntagatt.is. Skráning fer fram á heimasíðu Rannsóknarstofnunar Kennaraháskóla Íslands, rannsokn.khi.is og skal hafa borist í síðasta lagi miðvikudaginn 30. mars nk.