Sameining samþykkt í austanverðum Flóa
Sameining Gaulverjabæjarhrepps, Hraungerðishrepps og Villingaholtshrepps í austanverðum Flóanum var samþykkt í öllum hreppunum þremur í atkvæðagreiðslu sem fram fór í gær.
Við sameiningu sveitarfélaganna þriggja verður til um 530 manna sveitarfélag, en kosið verður til nýrrar sveitarstjórnar sameinaðs sveitarfélags í almennum sveitarstjórnarkosningum þann 27. maí næstkomandi.
| Þátttaka | Já | nei | Auðir/ógildir | Alls | |
| Gaulverjabæjarhreppur | 65,9% | 68,3% | 31,7% | 0,0% | 100,0% |
| Hraungerðishreppur | 77,5% | 52,7% | 46,4% | 0,9% | 100,0% |
| Villingaholtshreppur | 70,7% | 89,4% | 10,6% | 0,0% | 100,0% |
| Alls í hreppnum þremur | 72,1% | 69,3% | 30,3% | 0,4% | 100,0% |
Sveitarfélögum hefur nú fækkað á þessu kjörtímabili sveitarstjórna úr 105 í 83, en sameining hreppanna var þriðja sameiningartillagan sem samþykkt er í kjölfar sameiningarkosninga sem fram fóru víða um landið þann 8. október 2005.
Þann 11. mars næstkomandi verður kosið um sameiningu Húnavatnshrepps og Áshrepps í Austur- Húnavatnssýslu og sameiningu Hólmavíkurhrepps og Broddaneshrepps í Strandasýslu. Auk þess geta sveitarstjórnir Dalabyggðar og Saurbæjarhrepps enn nýtt sér heimild til sameiningar í kjölfar samþykktar meirihluta íbúa sveitarfélaganna í atkvæðagreiðslu þann 8. október 2005. Gangi ofangreindar sameiningarhugmyndir eftir, verða sveitarfélögin 80 í komandi sveitarstjórnarkosningum.
Nánari upplýsingar: www.floi.is