Sameining samþykkt á Þórshöfn og Bakkafirði
Meirihluti íbúa Skeggjastaðahrepps og Þórshafnarhrepps samþykkti sameiningu sveitarfélaganna tveggja í atkvæðagreiðslu sem fram fór í gær, laugardaginn 8. apríl.
Sameining sveitarfélaganna mun taka gildi að afloknum sveitarstjórnarkosningum þann 27. maí næstkomandi, en gert er ráð fyrir að 7 fulltrúar skipi sveitarstjórn sameinaðs sveitarfélags.
| Á kjörskrá | Kosningaþátttaka | Já sögðu | Nei sögðu | |
| Þórshafnarhreppur | 298 | 53,4% | 92,5% | 7,5% |
| Skeggjastaðahreppur | 79 | 83,5% | 57,6% | 42,4% |
Frá áramótum hafa farið fram atkvæðagreiðslur um sex sameiningartillögur í 14 sveitarfélögum og hafa þær allar verið samþykktar.
Í kjölfar þess að íbúar Þórshafnarhrepps og Skeggjastaðahrepps hafa samþykkt sameiningu sveitarfélaganna tveggja er ljóst að sveitarfélögin í landinu verða 79 við næstu sveitarstjórnarkosningar. Innan skamms verður hægt að nálgast nýjar upplýsingar um sveitarfélagaskipan á Íslandi á kosningavef félagsmálaráðuneytisins www.kosningar.is