Greiðsluafkoma ríkissjóðs janúar-mars 2006

• Greiðsluafkoma ríkissjóðs janúar-mars 2006 (PDF 98K)

Greiðsluuppgjör ríkissjóðs fyrir fyrsta ársfjórðung ársins 2006 liggur nú fyrir. Samkvæmt uppgjörinu eykst handbært fé frá rekstri um 23,8 ma.kr. innan ársins, sem er 15,4 ma.kr. hagstæðari útkoma heldur en á sama tíma í fyrra. Þá er útkoman 19,9 ma.kr. hagstæðari en gert var ráð fyrir í áætlun fjárlaga. Tekjur reyndust 20,3 ma.kr. hærri en í fyrra á meðan gjöldin hækka um 4,1 ma.kr. Hreinn lánsfjárjöfnuður er jákvæður um 21,3 ma.kr. sem er 5,8 ma.kr. betra en á sama tíma í fyrra.

Sjóðstreymi ríkissjóðs janúar–mars 2006

(Í milljónum króna)

Heildartekjur ríkissjóðs námu ríflega 99,7 ma.kr. á fyrsta ársfjórðungi þessa árs sem er 20,3 ma.kr meiri innheimta en á sama tíma í fyrra, eða 25,5% aukning. Ef hins vegar tekið er tillit til tilfærslu milli mánaða vegna tekjuskatts lögaðila nemur hækkunin 21,4%. Þar af námu skatttekjur og tryggingagjöld 91,3 ma.kr. sem er 21,6% hækkun frá síðasta ári. Á sama tíma hefur almennt verðlag hækkað um 4,3% þannig að skatttekjur og tryggingagjöld hækkuðu að raungildi um 16,5%.

Skattar á tekjur og hagnað námu 41 ma.kr. og hækkuðu um 11,7 ma.kr. frá síðasta ári, eða 40%. Munar þar mest um aukna innheimtu fjármagnstekjuskatts en á fyrstu þremur mánuðum þessa árs nam hún ríflega 13,9 ma.kr. sem er 45,4% aukning frá sama tíma árið á undan. Jafnframt skýrist 4,3 ma.kr. hækkun tekjuskatts lögaðila að mestu af áðurnefndri tilfærslu milli mánaða. Innheimt tryggingagjöld jukust einnig frá fyrra ári, eða um 16,1% en hér ber að nefna að launavísitala Hagstofunnar hækkaði um 8,5% á sama tímabili. Innheimta eignarskatta nam 3 ma.kr. sem er lækkun um 16,3% frá sama tímabili í fyrra. Þar af námu stimpilgjöld 2,2 ma.kr. en innheimta þeirra hefur dregist saman frá fyrra ári um 8,9% sem er meðal annars vegna þess að dregið hefur úr skuldbreytingu lána.

Innheimta almennra veltuskatta gefur nokkuð góða mynd af þróun innlendrar eftirspurnar en samanlagt hafa almennir veltuskattar hækkað um 20,5% frá fyrra ári. Þannig hafa tekjur af virðisaukaskatti aukist um 25,1% sem jafngildir 19,9% raunhækkun. Af öðrum óbeinum sköttum má nefna að vörugjöld af ökutækjum skiluðu tæpum þriðjungi meiri tekjum en á sama tíma í fyrra sem er umtalsverð aukning en þess má geta að á fyrstu þremur mánuðum þessa árs fjölgaði nýskráðum bifreiðum um 37,4%.

Greidd gjöld nema 74,4 ma.kr. og hækka um 4,1 ma.kr. frá fyrra ári, eða 5,9%. Í málaflokknum almannatryggingar og velferðarmál varð 1,3 ma.kr. aukning gjalda milli ára. Næstmest er aukningin í heilbrigðismálum, eða rúmir 1,2 ma.kr. og tæpir 1,2 ma.kr. í menntamálum. Samtals vega þessir þrír málaflokkar tæplega ⅔ af heildargjöldum ríkissjóðs. Útgjöld til löggæslu hækka um 0,5 ma.kr., eins og gjöld til menningarmála. Á móti hækkunum vegur 1,2 ma.kr. lækkun vaxtagjalda ríkissjóðs. Í janúar í fyrra var stór flokkur spariskírteina forinnleystur sem skýrir að mestu lækkun milli ára.

Lántökurársins nema aðeins 1,5 ma.kr. þrátt fyrir 9 ma.kr. afborganir innlendra skammtímalána.

Eiginfjárframlag ríkisins í Nýsköpunarsjóði var aukið um 1 ma.kr. á árinu og sama fjárhæð var greidd til Lífeyrissjóðs starfsmanna ríkisins í því skyni að lækka framtíðarskuldbindingar ríkissjóðs. Handbært fé ríkissjóðs jókst um 12,8 ma.kr. á fyrstu þremur mánuðum ársins 2006.

Tekjur ríkissjóðs janúar-mars 2006

Gjöld ríkissjóðs janúar-mars 2006