Greiðsluafkoma ríkissjóðs
Úr Vefriti fjármálaráðuneytisins – þú getur gerst áskrifandi að vefritinu.
Greiðsluuppgjör ríkissjóðs fyrir fyrsta ársfjórðung ársins 2006 liggur nú fyrir.
Samkvæmt uppgjörinu eykst handbært fé frá rekstri um 23,8 ma.kr. innan ársins, sem er 15,4 ma.kr. hagstæðari útkoma en í fyrra. Þá er útkoman 19,9 ma.kr. hagstæðari en gert var ráð fyrir í áætlun fjárlaga. Tekjur reyndust 20,3 ma.kr. hærri en í fyrra meðan gjöldin jukust um 4,1 ma.kr. Hreinn lánsfjárjöfnuður er jákvæður um 21,3 ma.kr. sem er 5,8 ma.kr. betra en á sama tíma í fyrra.
Heildartekjur ríkissjóðs námu ríflega 99,7 ma.kr. á fyrsta ársfjórðungi þessa árs sem er 25,5% meiri innheimta en á sama tíma í fyrra. Ef tillit er hins vegar tekið til tilfærslu milli mánaða vegna tekjuskatts lögaðila nemur hækkunin 21,4%. Þar af námu skatttekjur og tryggingagjöld 91,3 ma.kr. sem er 21,6% hækkun frá síðasta ári. Á sama tíma hefur almennt verðlag hækkað um 4,3% þannig að skatttekjur og tryggingagjöld hækkuðu að raungildi um 16,5%.
Skattar á tekjur og hagnað námu 41 ma.kr. og jukust um 40% milli ára. Munar þar mest um aukna innheimtu fjármagnstekjuskatts en á fyrsta ársfjórðungi þessa árs nam hún ríflega 13,9 ma.kr. sem er 45,4% aukning frá sama tíma árið á undan. Jafnframt skýrist 4,3 ma.kr. hækkun tekjuskatts lögaðila að mestu af áðurnefndri tilfærslu milli mánaða. Innheimt tryggingagjöld jukust einnig frá fyrra ári, um 16,1%, en á sama tíma hækkaði launavísitalan um 8,5%. Innheimta eignarskatta nam 3 ma.kr. sem er lækkun um 16,3% frá sama tímabili í fyrra. Þar af námu stimpilgjöld um 2,2 ma.kr. en innheimta þeirra hefur dregist saman frá fyrra ári um 8,9%.
Innheimta almennra veltuskatta gefur nokkuð góða mynd af þróun innlendrar eftirspurnar en samanlagt hafa almennir veltuskattar hækkað um 20,5% frá fyrra ári. Þannig hafa tekjur af virðisaukaskatti aukist um 25,1% sem jafngildir 19,9% raunhækkun. Af öðrum óbeinum sköttum má nefna að vörugjöld af ökutækjum skiluðu tæpum þriðjungi meiri tekjum en á sama tíma í fyrra sem er umtalsverð aukning en á fyrstu þremur mánuðum þessa árs fjölgaði nýskráðum bifreiðum um 37,4% frá sama tímabili í fyrra.
Greidd gjöld nema 74,4 ma.kr. og hækka um 4,1 ma.kr. milli ára, eða um 5,9%. Í gjaldaflokknum almannatryggingar og velferðarmál varð 1,3 ma.kr. aukning milli ára. Næstmest er aukningin í heilbrigðismálum og menntamálum. Samtals vega þessir þrír málaflokkar tæplega 2/3 af heildargjöldum. Útgjöld til löggæslu hækka um 0,5 ma.kr., eins og gjöld til menningarmála. Á móti hækkunum vegur 1,2 ma.kr. lækkun vaxtagjalda ríkissjóðs. Í janúar í fyrra var stór flokkur spariskírteina forinnleystur sem skýrir að mestu lækkun milli ára.