Sjávarútvegsráðherra Færeyja í opinberri heimsókn
Fréttatilkynning frá sjávarútvegsráðuneyti
Opinberri heimsókn sjávarútvegsráðherra Færeyinga til Íslands lokið
Opinberri heimsókn Björns Kalsö sjávarútvegsráðherra Færeyja og föruneytis hans til Íslands lauk í dag. Á fundi Einars K. Guðfinnssonar sjávarútvegsráðherra og Kalsö var m.a. rætt um ástand loðnustofnsins og veiðar úr honum. Ákvörðun um veiðiheimildir Færeyinga verður tekin þegar nánari vitneskja liggur fyrir um ástand stofnsins. Færeyingar ítrekuðu vilja sinn til að mega nýta loðnuna sem þeir veiða í íslenskri lögsögu í annað en bræðslu.
Farið var yfir stöðuna í sjóræningjaveiðum á Reykjaneshrygg. Einar K. Guðfinnsson lýsti vonbrigðum sínum með að sjóræningjaskip hafi fengið þjónustu í höfnum aðildarríkja Norðuaustur-Atlantshafsfiksveiðinefndarinnar, NEAFC og nauðsynlegt sé að aðildarríkin leggi baráttunni gegn ólöglegum og óábyrgum veiðum lið af sama kappi og Íslendingar hafi gert. Kalsö kvað Færeyinga reiðubúna að sinna skildum sínum í samræmi við samþykktir NEAFC og kannað verði hvort færeysk eftirlitsskip geti lagt Landhelgisgæslu Íslands lið við eftirlit á Reykjaneshrygg.
Þá var rætt um skýrslu um samkeppnishæfni sjávarútvegs í Íslandi og Noregi, sem kynnt var í desember 2005. Færeyingar hafa hug á að taka þátt í næsta samanburði.
Í kjölfar fundarins kynnti Kalsö sér starfsemi nokkurra fyrirtækja bæði á höfuðborgarsvæðinu og á Vestfjörðum. Hann heimsótti Marel og HB-Granda. Brá sér í beitningaskúr í Bolungarvík, upp á Bolafjall og í minjasafnið í Ósvör, skoðaði 3x-Stál á Ísafirði, þorskeldi í Álftafirði, snjóflóðavarnir á Flateyri og leikskóla sem Færeyingar gáfu Súðvíkingum og Flateyringum í kjölfar snjóflóðanna árið 1995. Með Birni Kalsö í för voru Hennibeth Kalsö eiginkona hans og Rógvi Reinert ráðuneytisstjóri.
Með börnunum eru, talið frá vinstri: Barbara Ferster leikskólastjóri, Einar K. Guðfinnsson sjávarútvegsráðherra og eiginkona hans Sigrún J. Þórisdóttir, Rógvi Reinert ráðuneytisstjóri færeyska sjávarútvegsráðuneytisins, Halldór Halldórsson bæjarstjóri Ísafjarðarbæjar, Björn Kalsö sjávarútvegsráðherra Færeyja og eiginkona hans Hennibeth Kalsö. Soffía Ingimarsdóttir krýpur fyrir miðju með börnunum.
þorskeldið í Álftafirði, þar sem ráðherrarnir fóðra þorsk í kvíum Hraðfrystihússins Gunnvarar.
Sjávarútvegsráðuneytinu 17. maí 2006