Undirritun verksamnings um Olweusarverkefnið í grunnskólum 2006-2008

Undirritaður var í dag, 18. maí, verksamningur um rekstur Olweusarverkefnisins gegn einelti í grunnskólum 2006-2008.

Þorgerður Katrín Gunnarsdóttir menntamálaráðherra, Þórður Skúlason, framkvæmdastjóri Sambands íslenskra sveitarfélaga og Hanna Hjartardóttir, formaður Félags skólastjóra fyrir hönd Kennarasambands Íslands og Þorlákur Helgason framkvæmdastjóri Olweusarverkefnisins, undirrituðu í dag, 18. maí, verksamning um rekstur Olweusarverkefnisins gegn einelti í grunnskólum 2006-2008.

Með verksamningnum er tryggt að allt að 30 grunnskólar geti hafið innleiðingu verkefnisins þegar við upphaf næsta skólaárs, haustið 2006 og að þeir skólar sem fyrir eru í verkefninu geti haldið markvissu starfi áfram með þeim skyldum sem fylgja því að vera virkur þátttakandi í verkefninu. Frá því að Olweusarverkefnið hófst haustið 2002 hafa 75 grunnskólar með um helming allra grunnskólanemenda í landinu tekið þátt í eineltisáætluninni. Næsta skólaár er gert ráð fyrir að skólar með allt að 10 þúsund nemendur bætist við og þar með nái verkefnið til allt að 75% grunnskólanemenda í landinu.

Olweusarverkefnið er viðamikið forvarnarstarf þar sem allir starfsmenn skóla og aðilar úr grenndarsamfélaginu eru beinir þátttakendur. Sérstök áhersla er lögð á virka þátttöku foreldra og öflugt samstarf heimila og skóla. Ætla má að um fimm þúsund starfsmenn í grunnskólum, félagsmiðstöðvum, íþróttafélögum, kirkjunni og fleiri stofnunum og samtökum hafi með skipulögðum hætti öðlast þekkingu og færni að vinna gegn einelti, uppræta það og skapa nemendum umhverfi þar sem ofbeldi þrífst ekki. Nemendur hafa með markvissum hætti í skóla og með foreldrum sínum fjallað um mikilvægi þess að temja sér að bera gagnkvæma virðingu, segja frá, andmæla einelti og taka afstöðu gegn því.

Olweusaráætlunin beinist fyrst og fremst að forvörnum og tekur á ýmsum þeim áhættuþáttum sem herja á börn og unglinga. Einörð afstaða og ábyrgð hinna fullorðnu er grundvallaratriði og að samstaða náist í skóla og á heimilum um þau viðmið sem skulu í hávegum höfð. Á vegum Olweusarverkefnisins hafa viðamiklar kannanir um einelti og líðan nemenda í 4.-10. bekk verið lagðar fyrir samtals 32 þúsund nemendur fimm sinnum á tímabilinu 2002-2006, fyrst í nóvember 2002 og síðast í mars 2006. Þær sýna að dregið hefur verulega úr einelti í grunnskólum og allir þátttökuskólar hafa fengið niðurstöður sem nýtast sem grunnur að áframhaldandi starfi skólanna til að skapa nemendum sem öruggast skólaumhverfi.

Olweusarverkefnið er samstarfsverkefni menntamálaráðuneytis, Kennarasambands Íslands, Sambands íslenskra sveitarfélaga, einstakra sveitarfélaga, Heimilis og skóla, Kennaraháskóla Íslands og Námsgagnastofnunar.

Fjölmiðlafólki er boðið að ræða við aðstandendur verkefnisins að lokinni athöfn í Snælandsskóla eða á öðrum tíma. Nánari upplýsingar eru aðgengilegar á heimasíðu verkefnisins, olweus.is.