Staða forstöðumanns Stofnunar Árna Magnússonar í íslenskum fræðum er laus til umsóknar.

Staða forstöðumanns Stofnunar Árna Magnússonar í íslenskum fræðum er laus til umsóknar.

Með lögum um Stofnun Árna Magnússonar í íslenskum fræðum, nr. 40/2006, voru eftirtaldar stofnanir sameinaðar: Stofnun Árna Magnússonar á Íslandi, Orðabók Háskóla Íslands, Íslensk málstöð, Örnefnastofnun Íslands og Stofnun Sigurðar Nordals.

Í samræmi við 1. mgr. 5. gr. laganna auglýsir menntamálaráðherra hér með lausa til umsóknar stöðu forstöðumanns við stofnunina.

Forstöðumaður Stofnunar Árna Magnússonar í íslenskum fræðum skal hafa hæfi sem prófessor á fræðasviði stofnunarinnar að mati þriggja manna dómnefndar sem menntamálaráðherra skipar. Forstöðumaður stjórnar starfsemi og rekstri stofnunarinnar. Hann ræður starfsmenn hennar og er í fyrirsvari fyrir hana. Hann ber ábyrgð á rekstri stofnunarinnar og að starfsemi hennar sé í samræmi við lög og stjórnvaldsfyrirmæli.

Menntamálaráðherra skipar forstöðumann til fimm ára að fenginni umsögn stjórnar stofnunarinnar, sbr. 1. mgr. 5. gr. laga um stofnunina. Skipunartímabil forstöðumanns er frá 1. september 2006.

Umsóknir skulu hafa borist menntamálaráðuneytinu, Sölvhólsgötu 4, 150 Reykjavík fyrir 31. júlí 2006.