Umsækjendur um stöðu forstöðumanns Stofnunar Árna Magnússonar í íslenskum fræðum

Umsóknarfrestur um stöðu forstöðumanns Stofnunar Árna Magnússonar í íslenskum fræðum er útrunninn og hafa menntamálaráðuneytinu borist fjórar umsóknir um stöðuna. Umsækjendur eru: Dr. phil. Gísli Sigurðsson, vísindamaður við Stofnun Árna Magnússonar á Íslandi, dr. Kristján Árnason, prófessor í íslenskri málfræði við Háskóla Íslands, dr. Úlfar Bragason, vísindamaður og forstöðumaður Stofnunar Sigurðar Nordals og dr. phil. Vésteinn Ólason, forstöðumaður Stofnunar Árna Magnússonar á Íslandi og prófessor við heimspekideild Háskóla Íslands.

Forstöðumaður skal hafa hæfi sem prófessor á fræðasviði stofnunarinnar, að mati þriggja manna dómnefndar sem menntamálaráðherra hefur skipað. Í dómnefndinni sitja: Professor Marianne Kalinke, formaður, tilnefnd af stjórn Stofnunar Árna Magnússonar í íslenskum fræðum, Eiríkur Rögnvaldsson, prófessor, tilnefndur af hugvísindadeild Háskóla Íslands og dr. Sigrún Pálsdóttir, sagnfræðingur, án tilnefningar.

Umsóknirnar hafa verið sendar dómnefndinni til meðferðar. Menntamálaráðherra skipar forstöðumann Stofnunar Árna Magnússonar í íslenskum fræðum til fimm ára eftir að mat dómnefndar liggur fyrir og að fenginni umsögn stjórnar stofnunarinnar, sbr. 5. gr. laga nr. 40/2006 um Stofnun Árna Magnússonar í íslenskum fræðum.