Ábendingar um umræðutorg, netspjall og rafrænar kannanir

Verkefnisstjórn um upplýsingasamfélagið hefur tekið saman ábendingar um umræðutorg, netspjall og rafrænar kannanir en tilgangur þeirra er að auðvelda stofnunum, ráðuneytum og sveitarfélögum að auka samráð og samskipti við almenning. Hér er átt við samráð í tengslum við stefnumótun eða gerð lagafrumvarpa, opna umræðu um afmörkuð málefni, beina rauntímaþjónustu á vef, rafrænar kannanir eða bein rauntímasamskipti almennings við kjörna fulltrúa svo dæmi séu tekin.

Í stefnunni um upplýsingasamfélagið, Auðlindir í allra þágu, er fjallað um hvernig styrkja megi lýðræðislega stjórnarhætti með þeim möguleikum sem ný tækni býður upp á og stuðla að auknum gæðum í stjórnsýslunni.

Þar er einnig tilgreint verkefni sem felur í sér að kannað verði hvernig og á hvaða sviðum auka megi samráð og samskipti milli almennings og opinberra aðila. Segir þar enn fremur að hvetja eigi sveitarfélög, ráðuneyti og ríkisstofnanir til að koma upp “slíkum umræðutorgum”.

Sveitarfélagið Garðabær og félagsmálaráðuneyti gerðu, í samráði við Verkefnisstjórn um upplýsingasamfélagið, tilraunir með notkun umræðutorga, netspjalls og rafrænna kannana.  Fyrir liggja skýrslur um niðurstöður þeirra tilrauna og var m.a. byggt á þeim við mótun ábendinganna. Framangreindar skýrslur ásamt öðru tengdu efni má finna á:   http://www.utvefur.is/fraedsla/samrad-samskipti/ .

                                                                                                                Reykjavík, 29. ágúst 2006