Fundur utanríkisráðherra og viðskiptafulltrúa Bandaríkjastjórnar

Valgerður Sverrisdóttir utanríkisráðherra og Susan Schwab viðskiptafulltrúi Bandaríkjastjórnar áttu fund í Washington í gær. Þær voru sammála um að mikilvægt væri að styrkja tengsl ríkjanna á viðskiptasviðinu og ryðja þyrfti viðskiptahindrunum úr vegi. Utanríkisráðherra tók sérstaklega upp möguleika á fríverslunarsamningi og fjárfestingarsamningi á milli ríkjanna, en sá síðarnefndi myndi meðal annars greiða fyrir langtímavegabréfsáritunum til Bandaríkjanna til handa íslenskum viðskiptaaðilum. Á fundinum var ákveðið að hátt settir embættismenn myndu hittast með reglulegu millibili til þess að liðka fyrir ofangreindum samningum. Á fundinum lýsti utanríkisráðherra ennfremur áhyggjum sínum af stöðu Doha-viðræðnanna og sagði afar mikilvægt fyrir viðskiptakerfi heimsins að hægt væri að blása nýju lífi í þær, sérstaklega fyrir þróunarríkin.