Embætti forstöðumanns Listasafns Íslands

Embætti forstöðumanns Listasafns Íslands er laust til umsóknar. Forstöðumaður Listasafns Íslands er stjórnandi safnsins og mótar listræna stefnu þess í samráði við safnráð. Hann stjórnar daglegum rekstri, skipuleggur sýningar á verkum safnsins og sér um aðra venjulega starfsemi.

Menntamálaráðherra skipar í embætti forstöðumanns Listasafns Íslands til næstu fimm ára, sbr. 1. mgr. 4. gr. laga um Listasafn Íslands, nr. 58/1988 og lög um réttindi og skyldur starfsmanna ríkisins, nr. 70/1996. Heimilt er að endurnýja skipun forstöðumanns Listasafns Íslands einu sinni til fimm ára og getur samanlagður skipunartími því lengstur orðið 10 ár. Í embættið skal skipaður einstaklingur með sérfræðilega menntun og staðgóða þekkingu á myndlist og rekstri listasafna. Gert er ráð fyrir því að skipað eða sett verði í embættið frá og með 1. mars 2007.

Um laun og starfskjör forstöðumanns Listasafns Íslands fer eftir ákvörðun kjararáðs, sbr. lög um kjararáð, nr. 47/2006.

Umsóknir með upplýsingum um menntun og starfsferil sendist menntamálaráðuneyti, Sölvhólsgötu 4, 150 Reykjavík. Umsóknarfrestur er til 27. nóvember nk.