Athugasemd vegna fréttar í RÚV og greinar í Vísbendingu

Athugasemd vegna fréttar í RÚV og greinar í Vísbendingu

Vegna fréttar sem birtist í kvöldfréttum Ríkisútvarpsins-hljóðvarps í gærkvöldi, á vefsíðu RÚV og í Vísbendingu um útreikning veiðigjalds vill ráðuneytið koma á framfæri eftirfarandi leiðréttingu. 

Forsendur í útreikningum Þórólfs Matthíassonar prófessors eru rangar þar sem hann gefur sér aðrar forsendur við útreikning á veiðigjaldi en segir til um í lögum nr. 116/2006 um stjórn fiskveiða.

Í frétt RÚV er vísað í grein í Vísbendingu og því haldið fram að sjávarútvegsráðuneytið hafi reiknað rangt út það gjald sem útgerð greiðir árlega við úthlutun veiðiheimilda. Því er haldið fram að fyrirtæki í sjávarútvegi hafi á undanförnum árum vangreitt veiðigjald að fjárhæð 214 m.kr. vegna þess að útreikningur á olíukostnaði hafi ekki verið réttur.

Vegna þessa vill ráðuneytið taka fram að í lögunum er tiltekið hvernig reikna skuli umræddan kostnað. Í greinargerð með frumvarpi sem síðar varð að lögum er nánar fjallað um forsendur útreikninganna. Þar kemur fram að við útreikning á veiðigjaldi skuli draga frá aflaverðmæti olíukostnað að fjárhæð 6,2 milljarða kr. Sú fjárhæð skal framreiknuð miðað við breytingar sem verða á skráðu verði á gasolíu á Rotterdammarkaði og skal miða við gasolíu 0,2 samkvæmt verðskráningu Platt´s. Sérstaklega er tiltekið að gert sé ráð fyrir að notuð séu sömu viðmið um breytingar á olíuverði og gert er í samningum útvegsmanna og sjómanna við ákvörðun á skiptaverðmæti, en þær forsendur hafa verið við lýði í tvo áratugi.

Útreikningar ráðuneytisins hafa tekið mið af framgreindum fyrirmælum löggjafans.

Sjávarútvegsráðuneytinu 14. nóvember 2006