Rætt við ESB um alþjóðlega ráðstefnu á Íslandi um vinnumarkað

Magnús Stefánsson félagsmálaráðherra átti fundi með fulltrúum framkvæmdastjórnar Evrópusambandsins í Brussel á sviði atvinnumála og jafnréttismála í fyrri viku auk þess sem hann hitti fulltrúa Eftirlitsstofnunar EFTA, EFTA-skrifstofunnar og sendiráðs Íslands í Brussel um þau svið sem varða félagsmálaráðuneytið.

Á fundi með fulltrúum framkvæmdastjórnar Evrópusambandsins kynnti félagsmálaráðherra mikla þátttöku kvenna og karla á vinnumarkaði hér á landi, 90% þátttöku feðra í þriggja mánaða fæðingarorlofi og fjallaði almennt um stöðu mála á vinnumarkaðnum.

Á fundinum kom fram áhugi af hálfu framkvæmdastjórnarinnar á frekara samstarfi við Íslendinga á þessu sviði. Meðal annars var reifuð sú hugmynd að félagsmálaráðuneytið efndi á næsta ári til alþjóðlegrar ráðstefnu á Íslandi þar sem fjallað yrði almennt um stöðu á vinnumarkaði og þróun í því efni, meðal annars út frá hugtakinu "flexicurity" eða sveigjanleika og öryggi og stöðu kynjanna á vinnumarkaði.