Heimsókn utanríkisráðherra til Litháen

FRÉTTATILKYNNING
frá utanríkisráðuneytinu

Nr. 087

Í dag átti Valgerður Sverrisdóttir utanríkisráðherra hádegisverðarfund með Petras Vaitiekunas utanríkisráðherra Litháen. Á fundinum ræddu ráðherrarnir meðal annars tvíhliða samskipti landanna, nýliðinn leiðtogafund Atlantshafsbandalagsins, öryggis- og varnarmál og Evrópumál.

Þá heimsótti utanríkisráðherra þinghúsið í Litháen og kynnti sér starfsemi íslenskra fyrirtækja í landinu, auk þess að vígja nýja ræðisskrifstofu Íslands í Vilníus.

Utanríkisráðherra heldur síðdegis til Genfar á ráðherrafund EFTA-ríkjanna.