25 milljónum króna úthlutað úr samkeppnisdeild Verkefnasjóðs sjávarútvegsins

Fréttatilkynning frá sjávarútvegsráðuneyti

25 milljónum króna úthlutað úr samkeppnisdeild Verkefnasjóðs sjávarútvegsins

Einar K. Guðfinnsson sjávarútvegsráðherra hefur, í samræmi við tillögur stjórnar samkeppnisdeildar Verkefnasjóðs sjávarútvegsins, úthlutað 25 milljónum króna úr sjóðnum til sjávarrannsókna á samkeppnissviði.

Alls bárust 33 umsóknir, þar af 25 vegna stærri verkefna og átta vegna minni verkefna. Sótt var um styrki fyrir 117,5 milljónir króna, eða nærri fimmfalt það fé sem deildin hafði til umráða að þessu sinni. Sex stór verkefni og þrjú minni hlutu brautargengi. Þetta er í fyrsta sinn eftir skipulagsbreytingar á Verkefnasjóði sjávarútvegsins sem styrkir eru veittir til sjávarrannsókna á samkeppnissviði. Styrkurinn nemur að hámarki 50% af heildarkostnaði hvers verkefnis. Sjóðurinn stuðlar því nú að nýsköpun og rannsókna- og þróunarstarfsemi fyrir a.m.k. 50 milljónir króna. Ætla má að þessi upphæð verði á endanum töluvert hærri.

Verkefnin taka til átta mismunandi tegunda sjávarlífvera. Aðalumsækjendur sex verkefnanna eru staðsettir utan höfuðborgarsvæðisins og í hinum 3 eru samstarfsaðilar einnig af landsbyggðinni.

Stjórn samkeppnisdeildar Verkefnasjóðs sjávarútvegsins skipa; Dr. Jakob K. Kristjánsson sem er formaður stjórnar, Rannveig Björnsdóttir lektor við viðskipta- og raunvísindadeild Háskólans á Akureyri og deildarstjóri fiskeldisdeildar Rannsóknastofnunar fiskiðnaðarins og Kristján G. Jóakimsson vinnslu- og markaðsstjóri hjá Hraðfrystihúsinu Gunnvöru hf.

 Jakob K. Kristjánsson og Einar K. Guðfinnsson.

Meðfylgjandi er listi yfir þau verkefni sem fengu styrk. Frekari upplýsingar má finna í Djúpinu, vefriti sjávarútvegsráðuneytisins.

Sjávarútvegsráðuneytinu 27. desember 2006