Umhverfisráðherra þakkar fyrir vel unnið verk

Jónína Bjartmarz umhverfisráðherra bauð á laugardag öllum þeim sem komu að aðgerðum á strandstað flutningaskipsins Wilson Muuga til móttöku í ráðherrabústaðnum við Tjarnargötu í Reykjavík. Við þetta tækifæri lýsti umhverfisráðherra yfir ánægju með það hversu vel gekk að koma í veg fyrir umhverfisslys á strandstað. Þá afhenti ráðherra og Davíð Egilson, forstjóri Umhverfisstofnunar, fulltrúum þyrlusveitar Landhelgisgæslunnar, Heilbrigðiseftirlits Suðurnesja, Framtaks, Olíudreifingar, sýslumannsins í Keflavík og Landsbjargar viðurkenningu fyrir vel unnin störf.

Á fimmtudag í liðinni viku var lokið við að tæma olíu úr tönkum Wilson Muuga á strandstað við Hvalsnes á Reykjanesi. Þar með lauk bráðaaðgerðum til að forða mengunarslysi sem stóðu sleitulaust í nær 30 klukkustundir. Á þessum tíma tókst að dæla um 95 tonnum af olíu í land en 10-15 tonn af olíu eru eftir í lestarrými skipsins. Ekki er hins vegar talið, að dýralífi og náttúru í kringum strandstaðinn stafi hætta af olíunni.