Nýr forstjóri Umhverfisstofnunar hóf störf í dag

Ellý Katrín Guðmundsdóttur hóf í dag störf sem forstjóri Umhverfisstofnunar. Jónína Bjartmarz umhverfisráðherra færði henni af því tilefni árnaðaróskir á morgunverðarfundi starfsmanna stofnunarinnar. Þá minnti umhverfisráðherra á mikilvægi Umhverfisstofnunar og benti á að hlutverk hennar hefði enn aukist með nýjum lögum sem Alþingi samþykkti við þinglok, til að mynda með lögum um takmörkun á losun gróðurhúsalofttegunda.

Ellý starfaði áður sem sviðsstýra Umhverfissviðs Reykjavíkurborgar. Þar áður gegndi hún starfi forstöðumanns Umhverfis- og heilbrigðisstofu Reykjavíkur og starfi hjá lagadeild Alþjóðabankans í Washington, DC í Bandaríkjunum. Hún lauk embættisprófi í lögfræði frá Háskóla Íslands árið 1990 og meistaraprófi í umhverfis- og alþjóðarétti frá University of Wisconsin Law School árið 1997.