Sjóræningjaskip tekin til niðurrifs

Fréttatilkynning frá sjávarútvegsráðuneytinu

 Sjóræningjaskip tekin til niðurrifs

Samkvæmt upplýsingum frá skrifstofu Norðaustur-Atlantshafsfiskveiðinefndarinnar (NEAFC) verða sex af þeim skipum sem stundað hafa ólöglegar karfaveiðar á Reykjaneshrygg undanfarin ár rifin á næstunni. Íslensk stjórnvöld hafa lagt mikla áherslu á aðgerðir gegn svokölluðum sjóræningjaveiðum undanfarin misseri, m.a. í samstarfi við hin aðildarríki NEAFC.

Alls eru 20 skip á lista NEAFC yfir skip sem staðfest er að hafi stundað eða stutt við sjóræningjaveiðar. Auk umræddra sex skipa hafa níu af skipunum verið kyrrsett í höfnum NEAFC-ríkja og fimm eru í verkefnum fjarri Norður-Atlantshafi.

Einar K. Guðfinnsson sjávarútvegsráðherra lýsti í dag ánægju sinni með að þessi sex skip muni ekki lengur stunda ólöglegar veiðar á Reykjaneshrygg. Hann sagði það vera ljóst að aðgerðir Íslands og annarra NEAFC-ríkja hefðu gert sjóræningjaveiðarnar óhagkvæmar og erfiðar og þannig örugglega átt mikinn þátt í því að útgerðir skipanna hafi ákveðið að senda skipin til niðurrifs frekar en að halda veiðum áfram. Einar benti jafnframt á að of snemmt væri að lýsa yfir sigri í málinu og sagði að áfram yrði fylgst vel með karfamiðunum og unnið gegn sjóræningjaskipum og þjónustuaðilum þeirra, þegar og ef slík skip koma á karfamiðin í ár.

Á morgun taka gildi nýjar reglur NEAFC um eftirlit í höfnum, sem ætlað er að þrengja enn frekar að ólöglegum veiðum. Varðandi nýju reglurnar er bent á upplýsingar í fréttatilkynningu sjávarútvegsráðuneytisins frá 18. apríl og heimasíðu NEAFC, www.neafc.org.

Sjávarútvegsráðuneytinu 30. apríl 2007.