Menningarsamningar undirritaðir
Menningarsamningar menntamálaráðuneytis og samgönguráðuneytis við sveitarfélög á Vestfjörðum og sveitarfélög á Norðurlandi vestra voru undirritaðir í gær. Tilgangur þeirra er að efla menningarstarf sveitarfélaganna og beina stuðningi ríkis og sveitarfélaganna við slíkt starf í einn farveg.
![samningur](/media/innanrikisraduneyti-media/media/frettir/samningur.jpg?proc=singleNewsItem)
Sturla Böðvarsson samgönguráðherra undirritaði samningana fyrir hönd ríkisins og þau Anna Guðrún Edvardsdóttir, formaður Fjórðungssambands Vestfirðinga, og Adolf Berndsen, formaður Samtaka sveitarfélaga á Norðurlandi vestra, fyrir hönd sinna svæða.
Samningarnir sem undirritaðir voru í gær eru hinir fyrstu sinnar tegundar þar sem gengið er til slíks samstarfs við sveitarfélög á Norðurlandi vestra og á Vestfjörðum. Áður hefur verið gengið til samstarfs við sveitarfélög í öðrum landshlutum með sambærilegum hætti.
Samstarfsvettvangur sveitarfélaganna á þessu sviði verður innan menningarráða. Hafa þau meðal annars það hlutverk að standa fyrir öflugu þróunarstarfi í menningarmálum, úthluta fjármagni til menningarverkefna og verkefna á sviði menningartengdrar ferðaþjónustu, jafnframt því að annast framkvæmd samningsins.
Jafnframt gerð menningarsamnings milli ríkis og sveitarfélaga munu sveitarfélögin ganga frá samstarfsamningi sem snýst um að samræma aðgerðir á sviði menningarmála á þeirra starfssvæði. Norðurland vestra verður eitt starfssvæði en á Vestfjörðum eru skilgreind þrjú samstarfssvæði, Strandasýsla og Reykhólahreppur, Vestur-Barðastrandasýsla og Ísafjarðarsýsla.