Ritið Samgöngur í þágu þjóðar komið út
Samgöngur í þágu þjóðar hefur að geyma margháttaðan fróðleik um hin ýmsu svið samgöngumála. Viðtöl eru við forstöðumenn stofnana og fyrirtækja sem heyra undir samgönguráðuneytið og hverju viðtali fylgja ýmsar fréttir um verkefni á viðkomandi sviði. Ritið er hliðstætt ritinu Samgöngur á nýrri öld, sem gefið var út fyrir fjórum árum en ritið var fyrst gefið út sem kynningarrit í tíð Steingríms J. Sigfússonar sem samgönguráðherra.
Í formála ritsins segir Sturla Böðvarsson samgönguráðherra meðal annars: ,,Með útgáfu ritsins Samgöngur í þágu þjóðar er sinnt þeirri sjálfsögðu upplýsingaskyldu ráðuneytisins að fyrir liggi samantekt á því sem unnið hefur verið að síðustu árin og um leið gefin innsýn í það sem framundan er. Vona ég að ritið geti verið mönnum fróðlegt aflestrar.”