Nýr félagsmálaráðherra tekur við embætti

Jóhanna Sigurðardóttir alþingismaður tók við embætti félagsmálaráðherra á ríkisráðsfundi á Bessastöðum í dag.

Magnús Stefánsson, fráfarandi félagsmálaráðherra, afhenti nú síðdegis Jóhönnu lyklana að ráðuneytinu á ráðherraskrifstofunni með árnaðaróskum og færði henni blóm og táknrænan lykil að velferð skjólstæðinga félagsmálaráðuneytisins. Jóhanna kvaðst mundu nota þann lykil.

Eftir að hafa rætt við fjölmiðla um ráðherraskiptin gekk Jóhanna um félagsmálaráðuneytið og heilsaði starfsfólki og sagðist hlakka til að takast á við hin ýmsu stóru mál sem væru á verksviði ráðuneytisins.

Jóhanna Sigurðardóttir er þingmaður Samfylkingarinnar í Reykjavíkurkjördæmi suður. Hún var áður félagsmálaráðherra frá árinu 1987 til 1994. Nánari upplýsingar má finna hér.

Magnús Stefánsson tók við embætti félagsmálaráðherra 15. júní 2006.