Greiðsluafkoma ríkissjóðs janúar-apríl 2007

• Greiðsluafkoma ríkissjóðs janúar-apríl 2007 (PDF 57K)

Greiðsluuppgjör ríkissjóðs fyrir fyrsta ársþriðjung ársins 2007 liggur nú fyrir. Samkvæmt uppgjörinu er breyting á handbæru fé frá rekstri jákvæð um 36,7 milljarða króna innan ársins, sem er 12,4 milljörðum hagstæðari útkoma heldur en á sama tíma í fyrra. Þá er útkoman mun hægstæðari en gert var ráð fyrir í áætlun fjárlaga. Tekjur reyndust 24,3 milljörðum hærri en í fyrra en gjöldin jukust um 13,4 milljarða. Hreinn lánsfjárjöfnuður er jákvæður um 4,8 milljarða króna sem er 17 milljörðum lakara en á sama tíma í fyrra. Viðsnúningurinn skýrist að mestu leyti af 30,3 milljarða kaupum ríkissjóðs á hlut Reykjavíkurborgar og Akureyrarbæjar í Landsvirkjun.

Lántökur ársins nema 46 milljörðum króna og hækka um tæpa 40 milljarða milli ára. Þar munar mest um 26,9 milljarða lántöku vegna kaupa á Landsvirkjun. Þá voru 1,3 milljarðar greiddir til Lífeyrissjóðs starfsmanna ríkisins í því skyni að lækka framtíðarskuldbindingar ríkissjóðs. Staða á sjóðs- og bankareikningum batnaði um 17,5 milljarða króna á fyrstu fjórum mánuðum ársins.

Sjóðstreymi ríkissjóðs janúar –apríl 2007

Innheimtar tekjur ríkissjóðs á fyrstu fjórum mánuðum ársins námu 149 milljörðum króna. Það er rúmum 24 milljörðum meira en í fyrra eða 22,7% aukning tekna milli ára. Skatttekjur og tryggingargjöld námu 138 milljörðum og jukust um 24 milljarða milli ára eða 14,2% að raunvirði (þá er tekjuskattur lögaðila í janúar 2006 leiðréttur fyrir tilfærslu eindaga yfir áramótin). Þar af námu skattar á tekjur og hagnað einstaklinga og lögaðila 58 milljörðum og jukust um 23,4% að raunvirði milli ára. Tekjuskattur einstaklinga nam 30 milljörðum, tekjuskattur lögaðila tæpum 8 milljörðum og fjármagnstekjuskattur tæpum 21 milljarði króna. Innheimta fjármagnstekjuskattsins fer að mestu leyti fram í janúar ár hvert og innheimtust 20 af 21 milljarði í janúarmánuði. Innheimta veltuskatta nam tæpum 62 milljörðum á tímabilinu, 9 milljörðum meira en á sama tíma í fyrra, sem samsvarar 9,3% aukningu umfram verðbólgu. Innheimt tryggingagjöld námu 13 milljörðum. Innheimta veltuskatta hefur tekið við sér aftur á síðustu mánuðum. Breyttar reglur um gjalddaga virðisaukaskatts (sem er um tveir þriðju hlutar veltuskattanna) hamla þó enn samanburði á skemmri tímabilum innan ársins. Miðað við hreyfanlegt 6 mánaða meðaltal er raunvöxtur veltuskatta í heild milli ára nú 6,2%.

Tekjur ríkissjóðs janúar –apríl 2007

Greidd gjöld ríkissjóðs námu 113,9 milljörðum króna í janúar-apríl og jukust um 13,4 milljarða frá fyrra ári, eða 13,3%. Mest munar um greiðslur almannatrygginga sem hækka um 3,6 milljarða. Þá hækka greiðslur til heilbrigðismála um 2,3 milljarða og til almennrar þjónustu um tæpa 2 milljarða. Greiðslur til menntamála hækka um 1,3 milljarða en aðrir málaflokkar hækka minna.

Gjöld ríkissjóðs janúar –apríl 2007