Styrkir veittir í tilefni Evrópuársins 2007

Jóhanna Sigurðardóttir félagsmálaráðherra veitti styrki í tilefni Evrópuársins 2007, Árs jafnra tækifæra, í Þjóðmenningarhúsinu í dag. Leitað var eftir verkefnum sem hafa það markmið að vinna að almennri og víðtækri vitundarvakningu í samfélaginu um mismunun á grundvelli kyns, öldrunar, kynþáttar, fötlunar, kynhneigðar eða trúar í samræmi við markmið ársins. Alls hlutu tíu verkefni frá félagsamtökum styrk að andvirði 2.000.000 króna. Verkefnin sem hlutu styrki í dag voru kynnt í Þjóðmenningarhúsinu af fulltrúum félagasamtaka.

Eftirfarandi verkefni hlutu styrk frá félagsmálaráðuneytinu:

Mannréttindaskrifstofa Íslands hlaut styrk í fjögur verkefni:

• Málstofu um mannréttindi aldraðra á Íslandi.
• Málstofu um mannréttindi transgender-einstaklinga.
• Fræðslu gegn misrétti.
• Plakataherferð gegn mismunun.

Halaleikhópurinn hlaut styrk til uppsetningar á leikritinu Gaukshreiðrinu.

Kvennaathvarfið hlaut tvo styrki, annars vegar til kynningarherferðar á vegum Kvennaathvarfsins og hins vegar í gerð á kynningarmyndbandi um Kvennaathvarfið.

Ísland Panorama hlaut styrk í verkefnið Innst við beinið erum við öll eins.

Femínistafélag Íslands hlaut styrk til ráðstefnunnar Samræða um margbreytileikann.

Barnaheill og Háskólinn á Akureyri hlutu styrk í verkefnið Gegn mismunun á öllum skólastigum.