Heimsókn til garðyrkjubænda

Samband garðyrkjubænda bauð sjávarútvegs- og landbúnaðarráðherra, ásamt sjávarútvegs- og landbúnaðarnefnd Alþingis og starfsmönnum landbúnaðarráðuneytisins í vel heppnaða kynnisferð um garðyrkjustöðvar á Suðurlandi miðvikudaginn 5. september.

Kynnt var það helsta er lýtur að greininni og byrjað á garðplöntum í gróðrarstöðinni Storð í Kópavogi. Því næst var kartöfluverksmiðjan í Þykkvabæ skoðuð og í kjölfarið snædd einstaklega góð kartöflusúpa að hætti heimamanna. Úr Þykkvabænum lá leiðin í garðyrkjustöðina Jörfa á Flúðum þar sem er heilsársræktun á paprikum og tómötum. Eftir skoðunarferð í Flúðasveppum, var boðið upp á ljúffengan paprikudjús, ferskt grænmeti og ávexti. Reykholt var síðasti áfangastaður og á Espiflöt voru gestir leiddir í allan sannleik um blómarækt á Íslandi, veittur góður beini og þeir leystir út með fallegum blómvöndum. Milli áningastaða fræddu fulltrúar greinarinnar ferðalanga um stöðu hennar og umfang, styrkleika og veikleika og svöruðu fyrirspurnum.

Ánægjulegum degi lauk með kvöldverði á Kaffi Kletti. Hvarvetna tóku staðarhaldarar hópnum með kostum og kynjum svo úr varð einstaklega skemmtileg og fræðandi ferð.