Greiðsluafkoma ríkissjóðs janúar-ágúst 2007

• Greiðsluafkoma ríkissjóðs janúar-ágúst 2007 (PDF 61K)

Greiðsluuppgjör ríkissjóðs eftir fyrstu átta mánuði ársins liggur nú fyrir. Handbært fé frá rekstri var jákvætt um 38,9 milljarða króna innan ársins, sem er 3,3 milljörðum hagstæðari útkoma en á sama tíma 2006. Hreinn lánsfjárjöfnuður er neikvæður um 23,8 ma. kr. sem er 57 ma.kr lakari afkoma heldur en í fyrra. Það skýrist að mestu leyti af 30,3 milljarða kaupum ríkissjóðs á hluta Reykjavíkurborgar og Akureyrarbæjar í Landsvirkjun og eiginfjáraukningu Seðlabanka Íslands með 44 milljarða króna eiginfjárframlagi í byrjun maí. Tekjur, án eignasölu, reyndust tæpum 33 milljörðum meiri en í fyrra og gjöldin hækkuðu um tæpa 29 milljarða frá fyrra ári.

Sjóðstreymi ríkissjóðs janúar – ágúst 2007

(Í milljónum króna)

Innheimtar tekjur ríkissjóðs námu 285 ma.kr. á fyrstu átta mánuðum ársins. Það er 39 ma.kr aukning frá sama tíma í fyrra, eða 13% aukning sé óreglulegum tekjum sleppt. Ef tekið er tillit til tilfærslu milli mánaða vegna tekjuskatts lögaðila í ársbyrjun 2006 nemur aukningin 17,4%, en tölurnar hér á eftir taka mið af henni. Skatttekjur og tryggingagjöld jukust um 13,7% að nafnvirði. Á sama tíma hækkaði almennt verðlag um 5,1% og raunaukning skatttekna og tryggingargjalda var því 8,2%. Aukning annarra rekstrartekna um 33% milli ára skýrist að mestu af auknum vaxtatekjum.

Skattar á tekjur og hagnað námu 92,9 ma.kr. og jukust um rúma 17 ma.kr. frá síðasta ári, eða 22,6%. Þar af jókst tekjuskattur einstaklinga um 11%, tekjuskattur lögaðila jókst um 32% og fjármagnstekjuskattur um 52%. Innheimt tryggingagjöld jukust um 6,6% milli ára á meðan launavísitalan hækkaði um 9,4%. Innheimta eignarskatta nam 7,3 ma.kr. og jókst um 15,4% frá sama tímabili í fyrra. Þar af námu stimpilgjöld 5,9 ma.kr. en innheimta þeirra á árinu hefur hefur aukist um 900 milljónir frá fyrra ári.

Innheimta almennra veltuskatta gefur nokkuð góða mynd af þróun innlendrar eftirspurnar. Hún nam 126,6 ma.kr. á fyrstu átta mánuðum ársins og jókst um 8% að nafnvirði frá fyrra ári eða 3% umfram hækkun vísitölu neysluverðs. Tekjur af virðisaukaskatti hafa aukist um 10% sem jafngildir tæplega 5% raunaukningu. Vegna lagabreytingar sem felur í sér rýmri greiðslufrest á virðisaukaskatti og aðflutningsgjöldum fer marktækni samanburðar við fyrra ár eftir því hvaða tímabil innan ársins er til skoðunar. Þegar litið á 6 mánaða hreyfanlegt meðaltal kemur fram að raunbreytingin er 0,3% á milli ára og hefur ekki verið minni frá nóvember 2002. Af helstu einstökum liðum veltutengdra skatta er mest aukning í sköttum á olíu og þungaskatti en vörugjöld af ökutækjum drógust hins vegar mest saman eða um 8% milli ára.

Greidd gjöld nema 238,5 milljörðum króna og hækka um 28,8 milljaða milli ára, eða um 13,7%. Mest aukning er vegna almannatrygginga- og velferðarmála 8,2 milljarðar eða 16,4%. Þar er aukningin mest í lífeyristryggingum 4,4 ma. kr, barnabótum 1,1, ma kr. og vaxtabótum 0,8 ma. kr. Hins vegar er hlutfallsleg aukning mest í almennri opinberri þjónustu, 23,7% eða 6,3 milljarðar. Þar munar mest um aukningu á milli ára í vaxtagjöldum um tæpa 3 ma.kr., en á þessu ári var fyrsti gjalddagi nýrra ríkisbréfa og voru vextir vegna þessa 1,4 ma.kr og vextir lána vegna kaupa á Landsvirkjun 600 m.kr. Auk þessa koma til auknar greiðslur vegna Jöfnunarsjóðs sveitarfélaga, tæpar 900 m.kr. Aukning útgjalda til heilbrigðismála milli ára er 5,6 milljarðar, menntamála 2,8 milljarðar og efnahags- og atvinnumála 2,7 milljarðar.

Lánsfjárþörf ríkissjóðs var 62,8 milljarðar fyrstu 8 mánuði ársins, sem er 13,1 milljarði hagstæðari útkoma en áætlað var. Hrein lánsfjárþörf var 23,8 milljarðar. Heildarlántökur námu 57,5 milljörðum króna og eru að langstærstum hluta teknar innanlands eða 54,2 milljarðar. Stærsta einstaka lántakan er vegna kaupa á Landsvirkjun 26,9 milljarðar. Afborganir lána eru 36,4 milljarðar, þar af eru 14,2 milljarðar greiddir upp af erlendum lánum.

 Tekjur ríkissjóðs janúar – ágúst 2007

Gjöld ríkissjóðs janúar – ágúst 2007