Fjármunamyndun hins opinbera

Úr Vefriti fjármálaráðuneytisins 15. nóvember 2007 - þú getur gerst áskrifandi að vefritinu.

Fjárfesting hins opinbera hefur verið í umræðunni í kjölfar vaxtahækkunar Seðlabanka Íslands þann 1. nóvember sl.

Frá árinu 1996 hefur fjármunamyndun hins opinbera vegið að meðaltali um 3,9% af vergri landsframleiðslu. Hlutur fjármunamyndunar hins opinbera af landsframleiðslu hafði farið minnkandi frá árinu 2001 og nam 3,1% árið 2005.

Árið 2006 var vöxtur fjármunamyndunar hins opinbera meiri en nam vexti hagkerfisins og nam hlutfallið 4% það ár. Á tímabilinu 1996-2006 var fjármunamyndun ríkissjóðs að meðaltali 1,9% af landsframleiðslu en 2,1% hjá sveitarfélögum.

Á síðustu árum hefur fjárfesting ríkissjóðs verið með allra minnsta móti en mörgum verkefnum var frestað á meðan mesti kúfurinn af stóriðjuframkvæmdunum gekk yfir.

Aukningin í fjárfestingu hins opinbera á milli áranna 2005 og 2006 má að verulegu leyti rekja til fjárfestinga sveitarfélaganna sem voru með allra mesta móti á síðasta ári. Það má rekja til þess að mikið af nýjum íbúðahverfum hafa verið að rísa og því fylgir veruleg fjármunamyndun af hálfu sveitarfélaganna.

Fjármunamyndun hins opinbera