Náttúrufræðistofnun Íslands verður við Jónasartorg

Ákveðið hefur verið að torgið sem fyrirhugað hús Náttúrufræðistofnunar Íslands mun rísa við skuli heita Jónasartorg. Bæjarstjórn Garðabæjar samþykkt tillögu þess efnis í dag, á 200 ára fæðingarafmæli þjóðskáldsins og náttúrufræðingsins Jónasar Hallgrímssonar. Jónas hefur stundum verið kallaður fyrsti íslenski náttúrufræðingurinn.

Fyrr á þessu ári var ákveðið að reist yrði nýbygging í Urriðaholti sem hýsa á Náttúrufræðistofnun Íslands sem flyst þá frá Hlemmi í Reykjavík til Garðabæjar. Húsið mun rísa við torg neðst við Urriðaholtsbraut. Á heimasíðu Garðabæjar segir að torgið verði á fjölförnum stað og því sé hús Náttúrfræðistofnunar afar vel staðsett í holtinu. Með nafngiftinni sé tengslum Jónasar við náttúruvísindi haldið á lofti þótt vissulega sé hann þekktari sem þjóðskáld.  

Smellið hér til að lesa frétt á heimasíðu Garðabæjar.

Að neðan má sjá teikningu af fyrirhuguðu Jónasartorgi í Urriðaholti í Garðabæ.