Starf lögfræðings á lögfræðisviði laust til umsóknar

Menntamálaráðuneyti auglýsir laust til umsóknar starf lögfræðings á lögfræðisviði ráðuneytisins. Um er að ræða fullt starf.

Menntamálaráðuneyti er fjölbreyttur og áhugaverður vinnustaður. Á sviðinu reynir á lögfræðilega ráðgjöf innan ráðuneytisins, undirbúning stjórnsýsluúrskurða og ákvarðana um lögfræðileg málefni. Þar er enn fremur höfð umsjón með samningu lagafrumvarpa og reglugerða og af hálfu ráðuneytisins annast lögfræðisvið lögformlega framkvæmd EES-samningsins og alþjóðlegra samninga sem heyra undir ráðuneytið og Ísland er aðili að. Sviðið kemur einnig að stefnumótun í einstökum málum.

Ráðuneytið leitar að einstaklingi sem er jákvæður og reiðubúinn að takast á við krefjandi verkefni, góður í mannlegum samskiptum, er nákvæmur, skipulagður og sjálfstæður í vinnubrögðum.

Menntunarskilyrði eru embættispróf eða meistarapróf í lögfræði. Enn fremur er lögð áhersla á góða færni í ensku og a.m.k. einu Norðurlandamáli. Góð almenn tölvukunnátta er nauðsynleg og reynsla af störfum innan stjórnsýslunnar eða sambærilegum störfum er kostur.

Miðað er við að ráða í stöðuna sem fyrst.

Um kjör fer samkvæmt kjarasamningi fjármálaráðherra og Félags háskólamenntaðra starfsmanna Stjórnarráðsins.

Nánari upplýsingar um starfið veitir Kristín Jónsdóttir skrifstofustjóri upplýsinga- og þjónustusviðs. Umsóknir með upplýsingum um menntun og starfsferil sendist menntamálaráðuneyti, Sölvhólsgötu 4, 150 Reykjavík fyrir föstudaginn 21. desember nk. Umsókn skal fylgja yfirlýsing um að umsækjandi uppfylli almenn skilyrði 6. gr. laga nr. 70/1996, um réttindi og skyldur starfsmanna ríkisins, til þess að fá ráðningu í starf.

Öllum umsóknum verður svarað þegar ákvörðun um ráðningu hefur verið tekin.

Umsóknir um starfið gilda í sex mánuði.